«Да Гульняў абновімся»: у Магілёве на стадыёне «Спартак» пачалі рамонт перад II Гульнямі краін СНД

Абнаўленне фасадаў і трыбуны, замена лёгкаатлетычных дарожак і ўстаноўка новага табло: на магілёўскім стадыёне «Спартак» пачалі рамонтныя работы да маючых адбыцца II Гульняў краін СНД. У жніўні «Спартак» прыме спаборніцтвы па стральбе з лука.

«Мы ўжо прыступілі да абнаўлення стадыёна да маючых адбыцца маштабных Гульняў. Пачалі саматугам - дэмантавалі сядзенні на заходняй трыбуне. У бліжэйшы час правядзем невялікі касметычны рамонт і ўсталюем новыя зручныя сядзенні для гледачоў. Яны будуць з пэўным арнаментам, эскіз ужо зацвердзілі. Яшчэ ў пачатку гэтага года закупілі 2, 4 тыс. новых сядзенняў, - распавёў загадчык спартыўным комплексам «Спартак» Валерый Чарноў. - Акрамя гэтага, прывядзем у парадак фасады самога комплексу, уваходнай групы, абновім плот, каб ва ўсёй красе сустракаць спартоўцаў і госцяў».

Сур'ёзныя работы будуць праводзіцца па замене лёгкаатлетычных дарожак. «Маштабная рэканструкцыя стадыёна праходзіла ў 2008-2009 гадах. Тады тут зрабілі спецыяльнае пакрыццё, якое дазваляе лёгкаатлетам трэніравацца ў поўнай экіпіроўцы і на адкрытым паветры. За час эксплуатацыі пакрыццё састарэла маральна і фізічна, - дадаў загадчык. - Мы ўжо амаль цалкам дэмантавалі старое пакрыццё бегавых дарожак. У час гарадскіх суботнікаў папрасілі дапамогі ў спартыўных арганізацый горада, паколькі сваімі сіламі правесці такі аб'ём работ было складана. Прыемна адзначыць, што ўсе адгукнуліся на нашую просьбу і дапамаглі. Хочацца падзякаваць усім за праведзеную працу».

Разам з пакрыццём абновяць падушку, на якую яго будуць укладваць. «Тут пакуль складана вызначыць аб'ём працы, таму што толькі падняўшы ўсё, стане зразумела, што нам трэба зрабіць. Дзе-нідзе асела асфальтабетоннае пакрыццё, месцамі трэба мяняць ліўнеўкі і бардзюры. Усё прывядзем у парадак, а пасля прыступім да нанясення спецыяльнага прагумаванага пакрыцця - яго будуць укладваць спецыяльнай машынай. Для гэтага неабходна пэўная тэмпература паветра і хаця б 10 дзён без дажджоў. Пасля кладкі на яго вырабяць адмысловую разметку. Гэтыя працы яшчэ наперадзе», - адзначыў ён.

Маштабная частка работ давядзецца на замену наяўнага табло на сучаснае. «Гэта дапаможа павысіць узровень спартыўных мерапрыемстваў на нашай базе як падчас II Гульняў краін СНД, так і потым. У канцы траўня ўжо будзе змантавана новае», - адзначыў Валерый Чарноў.

Ужо ў чэрвені стадыён «Спартак» прыме тэставыя спаборніцтвы па стральбе з лука, што дасць магчымасць ацаніць пляцоўку і яе гатоўнасць да маючых адбыцца міжнародных спаборніцтваў.

«Працы трэба яшчэ нямала, але ўсё будзе зроблена ў тэрмін. Упэўнены: спаборніцтвы пройдуць на высокім узроўні як для спартоўцаў, так і для тых, хто прыйдзе і прыедзе за іх хварэць», - падсумаваў загадчык спартовага комплексу.

БЕЛТА