Дабрачынная акцыя «Цуды на Каляды» стартуе ў Магілёўскай вобласці сёння

Дабрачынная акцыя «Цуды на Каляды» стартуе ў Магілёўскай вобласці сёння. Пра гэта карэспандэнту сайта паведамілі ў абласным камітэце ГА «Беларускі рэспубліканскі саюз моладзі».

Традыцыйны праект адкрыецца ў 15.30 каля «Ёлкі жаданняў» у ААТ «Універмаг “Цэнтральны”» Магілёва. На зялёнай прыгажуні будуць развешаныя паштоўкі з запаветнымі марамі дзяцей. Пад ёй усталююць скрынку «Добрых сэрцаў», куды любы жадаючы зможа пакласці навагодні падарунак. Сабраныя сюрпрызы будуць перададзены навучэнцам Чэрыкаўскага, Клімавіцкага, Крычаўскага цэнтраў карэкцыйна-развіваючага навучання і рэабілітацыі. Акрамя гэтага, частку падарункаў атрымае шматдзетная сям’я Ціханавых са Слаўгарада. Дзякуючы гэтай акцыі валанцёры БРСМ дапамогуць выканаць навагоднія жаданні больш за 50 дзяцей.

Святочныя дабрачынныя праграмы акцыі «Цуды на Каляды» пройдуць ва ўсіх раёнах Магілёўшчыны. Валанцёры руху БРСМ «Добрае сэрца» і цімураўцы БРПА да 30 снежня будуць арганізоўваць конкурсы, святочныя праграмы, адрасныя віншаванні для выхаванцаў дзіцячых дамоў, школ-інтэрнатаў, прымальнікаў-размеркавальнікаў, прытулкаў для дзяцей-сірот, дзяцей-інвалідаў, дзяцей з абмежаванымі магчымасцямі, дзяцей, якія знаходзяцца ў рэабілітацыйных цэнтрах, бальніцах. Акрамя таго, акцыя ўключае збор спартыўнага інвентара, канцылярскіх тавараў, прадметаў для мастацкай творчасці, настольных гульняў, цацак, кніг для дзіцячых сацыяльных устаноў.

Дабрачынная акцыя «Цуды на Каляды» з’яўляецца рэспубліканскай. Нязменныя арганізатары праекта – БРСМ і Беларуская рэспубліканская піянерская арганізацыя. Сімвалам акцыі з’яўляецца чырвоная рукавічка, а своеасаблівай візітоўкай – «Ёлка жаданняў».

Вольга Емельянава