ДАІ сумесна са спецпадраздзяленнем «Страла» 10–11 кастрычніка ўзмоцніць кантроль на аўтадарогах Магілёўскай вобласці

З мэтай папярэджання дарожна-транспартных здарэнняў на тэрыторыі Магілёўскай вобласці супрацоўнікі Дзяржаўтаінспекцыі сумесна са спецпадраздзяленнем ДПС «Страла» ўзмоцняць кантроль за дарожным рухам. Пра гэта карэспандэнту сайта паведамілі ў аддзяленні па агітацыі і прапагандзе ДАІ УУС Магілёўскага аблвыканкама.

Масіраваная адпрацоўка пройдзе з 19.00 10 кастрычніка да 4.00 11 кастрычніка і з 14.00 да 23.00 11 кастрычніка на аўтадарогах: М-8 Мяжа Расійскай Федэрацыі – Віцебск – Гомель – Мяжа Украіны; Р-71 Магілёў – Слаўгарад; Р-122 Магілёў – Чэрыкаў – Касцюковічы; Р-123 Сялец – Масток – Дрыбін – Горкі.

Асаблівая ўвага будзе нададзена выяўленню грубых парушэнняў ПДР: кіраванне транспартам кіроўцамі ў стане ап’янення і бяспраўнікамі, невыкананне правілаў абгону і перавозкі пасажыраў (у першую чаргу, дзяцей), непрадастаўленне перавагі пешаходам. Не застануцца без увагі і парушэнні з боку апошніх, а таксама іншых удзельнікаў дарожнага руху.

Парушальнікі будуць прыцягнуты да адказнасці згодна з дзеючым заканадаўствам, як падкрэслілі суразмоўцы.