Дэлегат УНС: падтрымка маладзёжнай палітыкі – важны складнік будучыні краіны

Падтрымка і развіццё маладзёжнай палітыкі – важны складнік будучыні краіны. Такім меркаваннем падзяліўся дэлегат VI Усебеларускага народнага сходу, дырэктар Гістарычнага музея Крычава Уладзімір Мішчанка.

«Вялікі гонар і адказнасць прадстаўляць свой раён і моладзь Крычаўшчыны на такой важнай падзеі ў жыцці нашай дзяржавы. Гэта магчымасць выказаць не толькі свае ідэі і прапановы, але і ўсіх тых людзей, якія даверылі мне гэтую важную місію. Бо на Усебеларускім народным сходзе мы будзем вызначаць не толькі шлях развіцця дзяржавы, але і кожнага чалавека, кожнай сям'і ў нашай краіне, – сказаў Уладзімір Мішчанка. – І адзін з прыярытэтных напрамкаў у будучыні нашай краіны – гэта развіццё і падтрымка моладзі. Таму што менавіта ёй мы перададзім усе нашы дасягненні».

Як важны момант у развіцці маладзёжнай палітыкі Уладзімір Мішчанка адзначыў узняцце ўзроставага цэнзу моладзі. «У нас расце працягласць жыцця. Таму, на мой погляд, важна павялічыць узрост моладзі да 35 гадоў, – падкрэсліў ён. – Гэта дасць больш часу і магчымасцей адбыцца ў жыцці, знайсці занятак па душы. Акрамя гэтага, у чалавека будзе больш магчымасцей для выкарыстання розных ільгот і сацыяльных гарантый, якія даступныя моладзі. Гэта стане трывалым падмуркам для паспяховай і плённай працы ў будучыні».

Яшчэ адно пытанне, якое неабходна прапрацаваць, – стварэнне дзяржаўнай праграмы па грантавай падтрымцы маладзёжных арганізацый. «У нас актыўная і яркая моладзь. У юнакоў бываюць цікавыя і карысныя ідэі – я бачу гэта ў працы з узначаленым мною маладзёжным парламентам пры раённым Савеце дэпутатаў. Наяўнасць грантавай падтрымкі з боку дзяржавы дасць штуршок да яшчэ большага развіцця краіны. А стварэнне конкурснай асновы паміж арганізацыямі – гэта наяўнасць здаровай канкурэнцыі, пры якой ідэі і прапановы стануць больш абдуманымі, цікавымі і эфектыўнымі».

Акрамя гэтага, неабходна надаць больш увагі тым маладым людзям, якія плануюць жыць і працаваць у паўднёва-ўсходнім рэгіёне Магілёўскай вобласці. «Для гэтых юнакоў важна прадумаць дадатковыя механізмы падтрымкі. Адно з такіх пытанняў – наяўнасць жылля. Бо калі ў маладога чалавека з'яўляецца сваё жыллё, ён ужо наўрад ці будзе шукаць працу ў іншым горадзе ці раёне. Гэта аснова, якая ў будучыні дазволіць замацавацца тут, стварыць сям'ю. Таму трэба прапрацаваць пытанне з арэндным жыллём для маладых спецыялістаў з правам яго выкупу праз пяць гадоў, – адзначыў дэлегат. – Яшчэ адзін важны момант – стварэнне працоўных месцаў, асабліва высокатэхналагічных. Усё гэта дасць магчымасць не страціць тых спецыялістаў, у якіх мае патрэбу раён».

Уладзімір Мішчанка сам родам з Крычаўскага раёна. Пасля заканчэння гістарычнага факультэта МДУ імя А.А.Куляшова вярнуўся ў родную школу ў аграгарадку Бацвінаўка. «Мне як маладому спецыялісту, вядома, было прасцей, чым іншым. Я ведаў настаўнікаў, мясцовых жыхароў. Гэта дазволіла хутка адаптавацца і ўліцца ў працу, – адзначыў ён. – У 2016 годзе ўзначаліў гістарычны музей у Крычаве. Гэта таксама цікавая праца, у якой заўсёды трэба шукаць нешта новае. Нам у спадчыну дастаўся выдатны палацава-паркавы комплекс, які стараемся развіваць і рабіць цікавым як для мясцовых жыхароў і гасцей з Беларусі, так і для замежнікаў. У любой працы важная самааддача. І калі ты любіш тое, што робіш, падыходзіш да працы адказна і сур'ёзна, – поспех гарантаваны. У нашага музея вялікія планы на бягучы год. Гэта рэалізацыя сумеснага праекта з прадстаўнікамі Беларусі, Расіі, Украіны і Малдовы. Будзем ствараць вялікую віртуальную экспазіцыю «Дарогамі Пацёмкіна: па памятных мясцінах князя-стваральніка». Мы ўжо рэалізавалі некалькі буйных экапраектаў. Адзін з іх стаў магчымым дзякуючы перамозе ў конкурсе «Праграма малых грантаў Глабальнага экалагічнага фонду». У выніку парк каля музея змяніўся, з'явіліся экзатычныя расліны, арт-аб'екты. Акрамя гэтага, мы рэканструявалі кацельню, замянілі асвятленне ў музеі – зараз яно стала энергазберагальным. Гэта вялікая праца, якая дазваляе нашаму музею заставацца цікавай і запатрабаванай турыстычнай кропкай на карце Беларусі».

Дэлегат адзначыў, што ў такім насычаным жыцці важная падтрымка сям'і і блізкіх. «Мая жонка таксама з Крычаўскага раёна, настаўнік па адукацыі. А зусім нядаўна мы ўпершыню сталі бацькамі. І, вядома, цяпер гэта самая галоўная падзея ў нашым жыцці, якая дае не толькі сілы, але і натхненне. Таму што ўсё тое, што я раблю ў грамадскім жыцці раёна, у музеі, раблю у тым ліку для сваіх блізкіх».

БЕЛТА