Для мілых дам: каля 20 тыс. кветак падрыхтаваў «Магілёўзелянбуд» да 8 Сакавіка

Каля 20 тыс. кветак падрыхтаваў «Магілёўзелянбуд» да Міжнароднага жаночага дня. Пра гэта расказала начальнік аддзела маркетынгу і збыту прадпрыемства Марціна Багайчук.

У асартыменце шырока прадстаўлены ружы беларускай і імпартнай вытворчасці – 8,5 тыс. штук. Цюльпанаў нарыхтавана каля 8 тыс. адзінак, з якіх 5 тыс. вырашчана ў цяпліцах прадпрыемства. Дарэчы, цюльпаны мясцовай вытворчасці выгадна адрозніваюцца сваёй устойлівасцю: з-за адсутнасці працяглай транспарціроўкі прыгожыя, але вельмі далікатныя кветкі не звянуць на наступны ж дзень, а будуць прыносіць радасць як мінімум тыдзень.

«Каляровая гама гэтых любімых усімі вясновых кветак – ад далікатных белых і малочных адценняў да ярка-чырвоных, бардовых і фіялетавых, – адзначыла Марціна Багайчук. – Вядома ж, у дастатковай колькасці прадстаўлены жоўтыя цюльпаны, якія сталі сапраўдным сімвалам Міжнароднага жаночага дня. Да 8 сакавіка нарыхтаваны шырокі асартымент іншых кветак, у іх ліку эустомы, куставая і півоняпадобная ружы, мацыёлы, герберы, гартэнзіі, касачы, лілеі, фрэзіі, гваздзікі і гіяцынты. Такіх падрыхтавана больш за 1 тыс. штук».

Што тычыцца афармлення букетаў, асаблівую папулярнасць сёння маюць капялюшныя скрынкі, а таксама кветкі ў максімальна простай і экалагічнай упакоўцы – напрыклад, абгорнутыя паперай. «Набірае абароты тэндэнцыя, калі бярэмя кветак дораць наогул без пакавальнага матэрыялу – атрымліваецца пяшчотна і натуральна», – расказалі спецыялісты «Магілёўзелянбуда».

Акрамя таго, у апошні час мужчыны ахвотна дораць дзяўчатам гаршковыя расліны. Такіх нарыхтавана некалькі тысяч – як уласнай, так і імпартнай вытворчасці. У ліку пакупных – азаліі, ружы, гардэніі, антурыумы, цыкламены, фіялкі. Сярод вырашчаных спецыялістамі прадпрыемства – гіяцынты і духмяныя крокусы, якія таксама вельмі любяць прадстаўніцы прыгожага полу. «Жадаючыя могуць знайсці да свята кветкі на любы густ і кашалёк», – упэўнена Марціна Багайчук.

Дарэчы, сёлета цэны на кветкі ў Магілёве будуць дэмакратычнымі. Напрыклад, цюльпан абыдзецца ў Br3, кошт ружы беларускай вытворчасці будзе вар’іравацца ў залежнасці ад яе даўжыні – кветкі са сцяблом 40 см прапануюць за Br3,80 см – Br5,5. Традыцыйна напярэдадні свята і на 8 Сакавіка графік працы фірменных магазінаў прадпрыемства скарэкціраваны. Гандлёвыя кропкі будуць адкрыты да апошняга кліента.

БЕЛТА