Дні адчыненых дзвярэй праходзяць у Магілёўскай абласной бібліятэцы ім. В.І. Леніна

Як расказалі ў бібліятэцы, такія тэматычныя мерапрыемствы кожны раз падзелены на некалькі блокаў, якія адлюстроўваюць важныя вехі і падзеі ў жыцці нашай краіны.

Так, да Года якасці ў бібліятэцы пройдуць тэматычныя прагляды «Беларускія традыцыі якасці», дзе можна будзе даведацца пра вядомыя прадпрыемствы Беларусі ў харчовай, лёгкай прамысловасці і машынабудаванні, а таксама пра знакамітыя брэнды нашай краіны. Яшчэ адзін блок – «Імі ганарыцца Бялыніцкая зямля» - раскажа пра ўраджэнцаў Бялыніцкага раёна, Героях Савецкага Саюза і Сацыялістычнай працы. Яшчэ адзін прагляд пройдзе па тэме «Ад якаснай вучобы да якаснага жыцця». У гэтым блоку запланавана правядзенне інфармацыйнай гадзіны «Якасць і поспех», пазнавальнай гульні-віктарыны.

Наступны тэматычны блок, з якім змогуць пазнаёміцца госці, прысвечаны 80-годдзю вызвалення Беларусі ад нямецка-фашысцкіх захопнікаў. Тут можна будзе ўбачыць матэрыялы з фондаў Дзяржаўнага архіва грамадскіх аб'яднанняў Магілёва, творы пісьменнікаў-франтавікоў, а таксама гісторыка-дакументальную літаратуру пра Вялікую Айчынную вайну. Таксама будзе магчымасць узяць удзел ва ўроку памяці, прысвечаным вызваліцелям Магілёўшчыны, наведаць прэзентацыю ваенна-патрыятычнага інтэрнэт-праекта «Імёны Перамогі» і тэматычную гульню-віктарыну.

У гэтым годзе ў нашай краіне адзначылі 30-годдзе Канстытуцыі Рэспублікі Беларусь. Гэтай важнай падзеі прысвечаны яшчэ адзін блок дзён адчыненых дзвярэй пад назвай «Гісторыя маёй радзімы» - пра гісторыю ўтварэння 19 раёнаў Магілёўскай вобласці, развіццё беларускай Канстытуцыі на розных этапах, а таксама пра культурную сталіцу 2024 - гэты статус атрымаў горад Бялынічы Магілёўскай вобласці.

У блоку сучаснай кнігі госці змогуць пазнаёміцца з сучаснымі тэхналогіямі, якія дапаўняюць рэальны свет віртуальнымі аб'ектамі. З іх дапамогай можна не толькі чытаць кнігі, але і слухаць, гуляць, вырашаць галаваломкі і шматлікае іншае.

«У дні адчыненых дзвярэй мы адчыняем свае фонды для таго, каб прыцягнуць нашых чытачоў, паказаць ім новую літаратуру. Нядаўна ў Мінску прайшла вялікая кніжная выстава. Шмат з прэзентаваных там навінак прадстаўлены і ў нас», - распавялі ў бібліятэцы.

Дні адчыненых дзвярэй праходзяць 19-20 сакавіка.

БЕЛТА