Дыялогавая пляцоўка, прысвечаная тэме працоўных правоў і сацыяльных гарантый, пройдзе ў Магілёве 20 жніўня

Дыялогавая пляцоўка для маладых спецыялістаў і членаў БРСМ, прысвечаная актуальнай тэме працоўных правоў і сацыяльных гарантый, пройдзе ў Магілёве 20 жніўня. Пра гэта паведамілі ў Магілёўскім абласным камітэце грамадскага аб'яднання «Беларускі рэспубліканскі саюз моладзі».

Як растлумачылі субяседнікі, мерапрыемства праводзіцца ў рамках прававога праекта «Будзь У Праве», арганізатарам якога з'яўляюцца Міністэрства юстыцыі Рэспублікі Беларусь, БРСМ, рада маладых адвакатаў Беларускай рэспубліканскай калегіі адвакатаў і Беларуская натарыяльная палата. Дыялогавая пляцоўка стане прэзентацыйнай і пройдзе ва ўсіх абласных цэнтрах у адзіны дзень.

«Пачатак прафесійнага шляху - час, калі асабліва важна ведаць свае правы і магчымасці, - адзначылі ў БРСМ. - Падчас працы пляцоўкі эксперты разбяруць: якія льготы прадугледжаны для маладых спецыялістаў; як абараніць свае працоўныя правы; якія праграмы падтрымкі дзейнічаюць у Беларусі. Мерапрыемства арганізавана з мэтай інфармавання моладзі аб магчымасцях падтрымкі на пачатковым этапе прафесійнага шляху».

Удзельнікі змогуць у нефармальнай абстаноўцы паразмаўляць з вядучымі юрыстамі рэгіёну і атрымаць адказы на асабістыя пытанні.

Эксперты, у ліку якіх другі сакратар Магілёўскага АК ГА «БРСМ» Алег Бойка, старшыня СМА МагаКА, адвакат спецыялізаванай юрыдычнай кансультацыі «Бізнес-права» Анастасія Калеснікава, натарыус натарыяльнай канторы №1 Кастрычніцкага раёна Магілёва Анастасія Унучанкава, намеснік начальніка ўпраўлення аблвыканкама Крысціна Цымбарэвіч, пракансультуюць удзельнікаў і адкажуць на пытанні.

Рэд.