Дзесяць удзельнікаў будуць змагацца за тытул лепшага студэнта Магілёўскай вобласці

Абласны этап рэспубліканскага конкурсу «Студэнт года» пройдзе 4 снежня ў Магілёве, паведамілі ў абласным камітэце БРСМ.

За тытул «Студэнт года» будуць змагацца 10 лепшых прадстаўнікоў устаноў вышэйшай адукацыі рэгіёну, а пераможца прадставіць вобласць у рэспубліканскім фінале. Сярод удзельнікаў - студэнты Беларуска-Расійскага ўніверсітэта, Магілёўскага дзяржаўнага ўніверсітэта імя А.А. Куляшова, Беларускага дзяржаўнага ўніверсітэта харчовых і хімічных тэхналогій, БДСГА. Усе канкурсанты дабіліся высокіх вынікаў у вучобе, праявілі сябе ў розных сферах дзейнасці, а таксама актыўна ўдзельнічаюць у грамадскім жыцці.

Напрыклад, ад БРУ на конкурсную сцэну паднімуцца дзве чароўныя ўдзельніцы. Ксенія Быкава навучаецца на другім курсе факультэта ўпраўлення і інавацый. Дзяўчына займаецца спортам, чытаннем, танцамі, маляваннем, плаваннем, лыжамі і стральбой. Марыя Церахава вучыцца на трэцім курсе электратэхнічнага факультэта, захапляецца конным спортам і тэатрам. Яна ўпэўнена, што самае страшнае ў жыцці - не пацярпець няўдачу, а бяздзейнічаць.

Сярод удзельнікаў ёсць і адзіны юнак - Ягор Юрачка. Прадстаўнік БДСГА вучыцца на другім курсе факультэта бізнесу і права, любіць катацца на каньках і займаецца паэзіяй. Таксама яго вабіць тэатральнае мастацтва.

У ліку асноўных конкурсных этапаў - візітоўка-самапрэзентацыя, творчае апавяданне «Я ў будучай прафесіі», дэманстрацыя талентаў. Удзельнікам будуць выстаўляць балы не толькі члены журы, але і балельшчыкі: з дапамогай інтэрнет-галасавання яны выберуць пераможцу ў намінацыі «Студэнт года ONLINE». Этап конкурсу пройдзе на сцэне Магілёўскай абласной філармоніі. Пачатак - у 15.00.

БЕЛТА