Электронны кірмаш вакансій пройдзе ў Магілёве 21 кастрычніка

Электронны кірмаш вакансій пройдзе ў Магілёве 21 кастрычніка. Пра гэта паведамілі ва ўпраўленні па працы, занятасці і сацыяльнай абароне Магілёўскага гарвыканкама.

У гэты дзень з 10.00 да 12.00 у саіскальнікаў будзе магчымасць пагутарыць з наймальнікамі Магілёва ў рэжыме анлайн. «Падчас кірмашу тыя, хто шукае працу, змогуць знайсці прыдатную вакансію, перадаць свае рэзюмэ, задаць наймальнікам пытанні і, калі ўсё задавальняе, атрымаць запрашэнне на рэальнае субяседаванне», – адзначылі ва ўпраўленні па працы, занятасці і сацыяльнай абароне Магілёўскага гарвыканкама.

На гэтым кірмашы будзе прапанавана каля 300 свабодных працоўных месцаў ад прадпрыемстваў і арганізацый Магілёва: ААТ «Ольса», ААТ «Магілёўліфтмаш», ПУП «Тифлос», ГА «БелТІЗ», ВУП «Метиз» і іншых. Доступ да прадстаўленых вакансій захаваецца і пасля кірмашу, яны будуць аўтаматычна перанесены ў базу даных на партале службы занятасці.

«Электронны кірмаш вакансій будзе праводзіцца ў Магілёве сёмым разам. Кожны раз у іх прымае ўдзел каля 500 саіскальнікаў, каля 100 з іх звяртаецца па электронную кансультацыю», – адзначыла начальнік упраўлення па працы, занятасці і сацыяльнай абароне Марына Снытко.

Кірмаш вакансій пройдзе на электроннай пляцоўцы e-vacancy.by.

БЕЛТА