Фестываль «Палітра творчасці» ў Магілёве

Фестываль «Палітра творчасці» пройдзе 24–26 лістапада ў Магілёве. У гэтым годзе конкурс будзе прысвечаны 60-годдзю Беларуска-Расійскага ўніверсітэта.

Асаблівасць фестывалю заключаецца ў тым, што яго ўдзельнікамі становяцца канкурсанты, не звязаныя з атрыманнем адпаведнай творчай спецыяльнасці, – эканамісты, праграмісты, інжынеры, бухгалтары і многія іншыя. Мерапрыемства праходзіць з 2011 года і знаходзіць у студэнцкім асяроддзі пазітыўны водгук. Больш за тое, з кожным годам расце ўзровень творчага і выканальніцкага майстэрства ўдзельнікаў, якія заўсёды знаходзяць, чым здзівіць журы.

Фестываль аб’ядноўвае ў сабе 4 самастойныя творчыя напрамкі: штогадовы адкрыты конкурс папулярнай песні «Студэнцкі лістапад», конкурс сучаснага і эстраднага танца «Танцы 100%», конкурс «Тэатр +» і фотаконкурс. Пераможцы песеннага конкурсу вызначаюцца па дзвюх намінацыях – саліст і вакальны ансамбль. У танцавальным спаборніцтве найлепшых з найлепшых вызначаць па трох напрамках танца: эстрадны, сучасны (джаз-мадэрн, вог, данс-хол, брэйк-данс, хіп-хоп і інш.), а таксама тэатр танца – выступленне з элементамі шоу.

У конкурсе тэатральнага майстэрства ўдзельнікам прапануюць прэзентаваць творчыя нумары, якія адлюстроўваюць культурна-гістарычную спадчыну народаў Расіі і Беларусі. У фотаконкурсе студэнты могуць заявіцца ў дзвюх намінацыях: «Універсітэт. Студэнцтва. Традыцыі» і «Мая краіна – мая апора». «У першай павінны быць прадстаўлены работы, якія перадаюць студэнцкія традыцыі, якія аб’ядноўваюць пакаленні, а таксама творчыя праекты ўніверсітэта і культурна-забаўляльныя мерапрыемствы, прысвечаныя народнаму адзінству, – растлумачылі ў навучальнай установе. – У другой – здымкі, якія адлюстроўваюць развіццё краіны або вобраз чалавека-стваральніка, які працуе на карысць роднай зямлі».

Найлепшых узнагародзяць прызамі і дыпломамі адпаведных ступеняў. Цырымонія ўзнагароджання адбудзецца 26 лістапада на заключным гала-канцэрце. Як адзначылі ў ВНУ, мерапрыемства накіравана на кансалідацыю творчай моладзі Расіі і Беларусі, выяўленне і падтрымку таленавітых студэнтаў, захаванне і папулярызацыю культурнай спадчыны брацкіх народаў.

БЕЛТА