Галіновы прафсаюз накіраваў на аздараўленне дзяцей работнікаў ЖКГ Магілёўскай вобласці амаль Br100 тыс.

Амаль Br100 тыс. накіравалі прафсаюзныя арганізацыі і наймальнікі на патанненне летняга аздараўлення дзяцей работнікаў сферы жыллёва-камунальнай гаспадаркі. Аб гэтым паведамілі ў Магілёўскай абласной арганізацыі Беларускага прафсаюза работнікаў ЖКГ і сферы абслугоўвання.

«Прафсаюзнымі арганізацыямі галіны надаецца вялікая ўвага правядзенню кампаніі па летнім аздараўленні дзяцей, - распавёў старшыня абласной арганізацыі прафсаюза Павел Жуйкоў. - Штогод на гэтыя мэты абласны і першаснымі прафсаюзнымі арганізацыямі прадугледжваюцца грашовыя сродкі ў прафбюджэце. Па выніках перамоваў у калектыўныя дамовы арганізацый уключаныя таксама нормы аб патанненні кошту пуцёвак у дзіцячыя аздараўленчыя лагеры наймальнікамі».

Дзякуючы гэтай падтрымцы бацькі - члены прафсаюза змаглі атрымаць дапамогу на аздараўленне 393 дзяцей у лагерах з кругласутачным знаходжаннем.

Апроч фінансавай падтрымкі, прафсаюзы арганізавалі для дзяцей сябраў прафсаюза вольны час: шпацыр на цеплаходзе «Магілёў» па Дняпры, наведванне парку атракцыёнаў, а таксама экскурсіі - іх правялі прафарганізацыі Асіповіцкага УКП ЖКГ, Быхаўскага, Кіраўскага, Бялыніцкага, Клічаўскага, Мсціслаўскага жылкамгасаў, ААТ «Магілёўліфт» і іншыя.

БЕЛТА