Гандлёвыя рады працягласцю 600 метраў разгорнуцца на абласных «Дажынках» у Клімавічах

Гандлёвыя рады працягласцю 600 м разгорнуцца падчас абласнога фестывалю-кірмашу працаўнікоў вёскі «Дажынкі». Мерапрыемства пройдзе 16 лістапада ў Клімавічах, паведаміла намеснік начальніка галоўнага ўпраўлення гандлю і паслуг Магілёўскага аблвыканкама Вераніка Цітова.

«Фестываль-кірмаш «Дажынкі» традыцыйна становяцца галоўным сельскагаспадарчым святам у рэгіёне, дзе падводзяць вынікі ўборачнай і ўшаноўваюць перадавікоў, - адзначыла Вераніка Цітова. - Аднак добры настрой і святочную атмасферу будуць ствараць не толькі работнікі сферы культуры, але і прадстаўнікі гандлю: гасцям мерапрыемства прапануюць шырокі асартымент прадукцыі - усё тое, чым багатая магілёўская зямля».

У фестывалі-кірмашы прымуць удзел каля 60 суб'ектаў гаспадарання. Агульная працягласць гандлёвых радоў складзе амаль 600 м, а колькасць пасадачных месцаў перасягне за 500. Гандаль і грамадскае харчаванне размесцяцца на некалькіх вуліцах райцэнтра. Рэжым працы гандлёвых радоў вызначаны з 9.00 да 18.00.

У святочным гандлі прымуць удзел буйныя вытворцы Магілёўскай вобласці (у тым ліку ААТ «Бабулін гладыш», Булачна-кандытарская кампанія «Дамачай», Магілёўскі і Бабруйскі мясакамбінаты), а таксама прадпрыемствы сістэмы спажыўкааперацыі, прыватныя фірмы і індывідуальныя прадпрымальнікі, рамеснікі і фізічныя асобы. На фестывалі-кірмашы можна будзе набыць мясную прадукцыю, розныя віды каўбас і паўфабрыкатаў, хлебабулачныя і кулінарныя вырабы, а таксама гатовыя стравы. Майстры і ўмельцы прапануюць пакупнікам сувеніры, вагавы чай, спецыі, біжутэрыю, вырабы з дрэва і многае іншае.

Па словах Веранікі Цітовай, прыярытэтным напрамкам абслугоўвання наведвальнікаў традыцыйна стане прыгатаванне ежы навідавоку - будуць арганізаваны зоны-грыль з устаноўкай мангалаў, печаў-казанаў і ражонаў. Усё будзе смачна, апетытна, разнастайна і святочна.

БЕЛТА