Гендырэктар «Магілёўаблгазу»: мы заўсёды працуем на карысць людзей і дзяржавы

Калектыў РУП «Магілёўаблгаз» заўсёды працуе на карысць людзей і дзяржавы. Аб гэтым журналістам расказаў генеральны дырэктар прадпрыемства Руслан Волкаў.

«Штогод працягласць сетак павялічваецца. На сённяшні дзень у нас на балансе каля 8 тыс. км газаправодаў. Большая частка насельніцтва рэгіёну - нашы абаненты, - распавёў ён. - Газіфікаваны 154 аграгарадкі, а гэта - больш за 27 тыс. домаўладанняў».

У газавай гаспадарцы без дысцыпліны нельга, зазначыў Руслан Волкаў. «Задачы перад намі стаяць сур'ёзныя, а памылкі могуць каштаваць жыцця людзей. Мы развіваемся: у нашым складзе з'явіліся новыя філіялы, таму што сённяшняя эканамічная сітуацыя гаворыць аб тым, што трэба ісці ў нагу з часам і займацца не толькі газам, але і іншымі напрамкамі дзейнасці», - падзяліўся генеральны дырэктар.

Тут працуюць 2,5 тыс. чалавек. І настрой ва ўсіх, запэўніў кіраўнік, сур'ёзны. «Мы заўсёды працуем на карысць людзей і дзяржавы. У нашых працаўнікоў ёсць упэўненасць у будучыні - нашага прадпрыемства і краіны ў цэлым», - сказаў ён.

Планы на гэты год у «Магілёўаблгазу» шырокія. Так, плануецца падвесці прыродны газ да аграгарадка Падлужжа, вёскі Кадзіна, пасёлка Шчаткава.

«У гэтым годзе ўжо ўведзена ў эксплуатацыю тры сур'ёзныя аб'екты па падводзячых газаправодах: два аб'екты Крычаўскага раёна і чарнобыльская зона. Каля 30 кааператываў будзе газіфікавана да канца года ў вобласці. Тэмпы газіфікацыі сталі крыху ніжэйшымі, але гэта ніяк не звязана з тым, што ёсць цяжкасці. Гэта звязана з тым, што за апошнія 10-15 год мы газіфікавалі вельмі шмат населеных пунктаў. Праграма па газіфікацыі не спыняецца. З газам будзем», - падкрэсліў Руслан Волкаў.

Таксама сёлета работы па газіфікацыі пачнуцца ў вёсцы Кісялёва Буда, другая чарга - пасёлак Вялікі Мох, аграгарадок Мілаславічы Клімавіцкага раёна. Агульная працягласць трасы складзе 30 км, а завяршыць гэтыя работы плануюць у 2025 годзе.

Сёння на прадпрыемстве прайшла сустрэча калектыву з памочнікам Прэзідэнта - інспектарам па Магілёўскай вобласці Леанідам Мартынюком. Абмеркавалі важнае пытанне інфармацыйнай гігіены, а таксама пагаварылі аб рабоце і планах прадпрыемства.

«Такія сустрэчы для нашага калектыва вельмі важныя. Гэта дае магчымасць узаемадзейнічаць з уладай, калі яе прадстаўнікі прыходзяць у калектывы. Адчуваецца ўвага да нас, нашай працы. Ад працы не адрываемся, атрымліваем карысны эфект ад такіх сустрэч на месцах», - падзяліўся меркаваннем гендырэктар.

Вядзе прадпрыемства і сур'ёзную інфармацыйную працу ў інтэрнэце: старонкі ў сацыяльных сетках, інфармацыйны сайт, дзе публікуецца ўся актуальная інфармацыя аб газавай гаспадарцы рэгіёна, аб жыцці калектыва і прадпрыемствы. «У нас ёсць спецыялісты, якія займаюцца вывучэннем і аналізам інфармацыйнага поля, яны сочаць за павесткай і тым, што адбываецца, даюць рэкамендацыі, дзе можна пачытаць ці даведацца пра праўдзівую інфармацыю. Бо ў сучасным грамадстве без інфармацыйнай бяспекі нікуды», - сказаў Руслан Волкаў.

Газавікі Магілёўскай вобласці па-свойму змагаюцца з фэйкамі і іх магчымым з'яўленнем. «Уся інфармацыя аб нашай працы, аб тым, якія пасёлкі і аграгарадкі будуць газіфікавацца, якія зараз у стадыі газіфікацыі, знаходзіцца ў адкрытым доступе. Мы прапануем ствараць людзям кааператывы ва ўсіх раёнах газазабеспячэння, каб неабходная інфармацыя даходзіла да жыхароў своечасова, - адзначыў Руслан Волкаў. - Нечыя асцярогі з нагоды таго, што газіфікацыя дзесьці скончылася, - марныя. Працягвае працаваць указ Прэзідэнта нумар 368 (указ датычыцца газіфікацыі жыллёвага фонду. - Заўвага БЕЛТА). Усе працы ў нас вядуцца стабільна».

БЕЛТА