Гістарычны ўрок прайшоў у Барсукоўскай бібліятэцы Клімавіцкага раёна

Самая вядомая крэпасць у Беларусі - Брэсцкая. Гэта крэпасць-герой. Памежнікі першымі прынялі бой з перадавымі часткамі фашысцкай Нямеччыны. Гераічная абарона Брэсцкай крэпасці працягвалася з 22 чэрвеня па канец ліпеня 1941 года.

 

Самыя вядомыя замкі і палацы Беларусі: Мірскі замак - адзін з найбольш добра захаваных гісторыка-культурных помнікаў краіны; Лідскі замак - закладзены ў XIV стагоддзі князем Гедымінам для абароны ад крыжакоў; Нясвіжскі палац - рэзідэнцыя знакамітага роду Радзівілаў; Палац Румянцавых і Паскевічаў у Гомелі - сярод знакамітых гасцей, якія пабылі тут, - расійская імператрыца Кацярына II, аўстрыйскі імператар Іосіф II, беларускі генерал-губернатар Захар Чарнышоў і іншыя. Дарэчы, пабывала імператрыца Кацярына і ў палацы Пацёмкіна ў Крычаве.

 

Пазнаёміліся школьнікі з нашымі выдатнымі прадстаўнікамі духоўнага і культурнага жыцця. У XII стагоддзі Беларусь праславілі Еўфрасіння Полацкая і Кірыл Тураўскі, у XVI і XVII стагоддзях - Францыск Скарына і Сімяон Полацкі.

І яшчэ шмат цікавага даведаліся хлопцы пра Беларусь падчас гістарычнага ўрока.

 

- Для кожнага з нас родная зямля - самая ветлая і непаўторная, самая родная. І якой яна будзе ў будучыні - залежыць ад вас, маладога пакалення, - падвяла вынік сустрэчы бібліятэкар.