Горацкая сельгасакадэмія правядзе конкурс «Агрантры-Беларусь» сярод школьнікаў

З 14 па 15 снежня на базе Беларускай дзяржаўнай сельгасакадэміі ў Горках пройдзе фінал рэспубліканскага конкурсу «Агрантры-Беларусь». У ім прымуць удзел сельскія школьнікі. Дзеці пакажуць свае здольнасці ў 5 намінацыях.

- Конкурс праводзіцца ўпершыню, але ўжо выклікаў ажыятаж: было пададзена 485 заявак, - адзначаюць у БДСГА. - Вядома, да фіналу дайшлі не ўсе. Увесну ўдзельнікі прайшлі мікракурсы па падрыхтоўцы і завочнае тэсціраванне. Намінацыі вельмі цікавыя: «Дабрапчол» (ужыванне лічбавых тэхналогій у традыцыйным пчалярстве), «Агракосмас» (выкарыстанне касмічных здымкаў і вэб-ГІС тэхналогій), «Аграбіё» (біялагічныя метады абароны ад хвароб і шкоднікаў сельгаскультур), «Аграробаты» і «Аграметэа ». Школьнікі не толькі прапануюць журы свае работы, але і паўдзельнічаюць у тэматычных трэнінгах і майстар-класах.

У Міністэрстве сельскай гаспадаркі і харчавання, пры падтрымцы якога арганізоўваецца конкурс, дадалі: «Агрантры-Беларусь» накіраваны на ўцягванне школьнікаў 5-11 класаў у інавацыйную і прадпрымальніцкую дзейнасць, фарміраванне «бясшвоўнай» адукацыі «школа-вуз-прадпрыемства». З дапамогай такіх мерапрыемстваў хлопцы даведаюцца больш аб прафесіях АПК, робяць у іх свае першыя крокі.