Ігар Сергяенка: беражлівыя пачуцці да сваёй школы і малой радзімы закладваюць адносіны да краіны

З беражлівых адносін да сваёй школы, роднага дома, сваёй малой радзімы пачынаецца фарміраванне будучых адносін да краіны ў цэлым. Такую думку выказаў кіраўнік Адміністрацыі Прэзідэнта Ігар Сергяенка ў час урачыстай лінейкі, прысвечанай Дню ведаў, у Аўсянкаўскай сярэдняй школе Горацкага раёна.

«Мне сёння вельмі прыемна знаходзіцца ў вашым утульным аграгарадку, на тэрыторыі гэтай цудоўнай школы, капітальны рамонт якой быў зроблены два гады таму. За гэтыя два гады яна стала яшчэ лепшай і яшчэ прыгажэйшай. Гэта сведчыць аб тым, што вы ўсе разам, сваёй працай на такім дастойным узроўні падтрымліваеце стан школы. Менавіта з такіх адносін да школы, роднага дома, пасёлка, сваёй малой радзімы фарміруюцца адносіны да краіны», - сказаў ён, звяртаючыся да вучняў, педагогаў і гасцей святочнай лінейкі.

Асаблівая ўвага сёння - першакласнікам. За парты школы ў Аўсянцы селі восем дзяцей. Звяртаючыся да іх, Ігар Сергяенка сказаў, што яны робяць свае першыя крокі ў свет ведаў, у дарослае жыццё. «Пачынаецца першы клас, які будзе напоўнены ведамі, сяброўствам, уражаннямі і клопатам педагогаў. Ад вашага стаўлення ў першую чаргу да вучобы будзе залежаць ваш далейшы жыццёвы шлях», - падкрэсліў ён.

Педагагічнаму калектыву школы кіраўнік Адміністрацыі Прэзідэнта падзякаваў за добрасумленную працу, за цярпенне, нестандартныя падыходы да навучання і выхавання. «Жыццё сёння няпростае. У век інфармацыйных тэхналогій, вядома ж, патрабаванні прад'яўляюцца павышаныя. І клопат аб педагогах і педагагічных кадрах у нас у краіне таксама на самым высокім узроўні. І таму як бы не мяняліся тэхнічныя ўмовы, але галоўным заўсёды застаецца чалавек, педагог», - сказаў ён.

Фарміраванне будучага грамадзяніна - гэта сумесная адказнасць бацькоў, педагогаў і дзяржавы. «Дарагія бацькі, хацелася б сказаць, каб вы былі ў гасцях у гэтай школе не толькі сёння ў святочны дзень, але і ў любы іншы. Таму што мы з вамі вырашаем агульную задачу - каб нашы з вамі дзеці былі здаровымі, адукаванымі і раслі сапраўднымі патрыётамі нашай краіны. Гэта асабліва актуальна і важна ў Год міру і стварэння», - адзначыў Ігар Сергяенка.

Ён павіншаваў усіх школьнікаў са святам, пажадаў поспехаў і стараннасці на шляху да ведаў. А каб працэс навучання быў яшчэ больш цікавым і якасным, кіраўнік Адміністрацыі Прэзідэнта перадаў школе новы мультыборд, затым азнаёміўся са школьнымі класамі і матэрыяльна-тэхнічнай базай установы адукацыі.

Дырэктар Аўсянкаўскай сярэдняй школы Валянціна Крэміс таксама павіншавала ўсіх прысутных з Днём ведаў. «Дарагія школьнікі! Хачу пажадаць вам добра вучыцца, радаваць бацькоў і педагогаў выдатнымі ведамі, высокімі ацэнкамі, актыўна прымаць удзел у жыцці нашай роднай школы, не баяцца праяўляць ініцыятыву, - адзначыла яна. - Паважаныя педагогі, хачу пажадаць вам ставіцца да работы з душой і натхненнем. Менавіта вы здольны развіць у дзецях уменне думаць, аналізаваць, адчуваць, суперажываць. Толькі вы можаце і здольны запаліць у вучнях цягу да вучобы».

Галоўныя героі свята - першакласнікі. Хлопчыкам і дзяўчынкам адрасаваны сёння самыя цёплыя і шчырыя словы віншаванняў. «Дарагія нашы першакласнікі! У вас сёння першы школьны дзень. Вы ўсе такія прыбраныя, урачыстыя. Хвалююцца вашы бацькі, настаўнік, хвалюецеся і вы, - сказала яна. - У нас з вамі доўгі шлях - цэлых адзінаццаць гадоў. Спадзяюся, шлях гэты будзе светлым: наперадзе вас чакаюць новыя сябры, добрыя адзнакі. Жадаю вам добрага настрою і поспехаў у вучобе»

Не менш значны сёння дзень і для вучняў 11-х класаў. «Дарагія адзінаццацікласнікі! Ваш далейшы лёс у вашых руках. Менавіта ў гэтым навучальным годзе вы павінны вызначыцца з прафесіяй, здаць цэнтралізаваныя экзамены, тэсціраванне і паступіць туды, куды марыце», - адзначыла Валянціна Крэміс.

З нецярпеннем чакаў сённяшняга свята вучань 10-га класа Аляксандр Цярэшкін. Падлетак падзяліўся, што лета ў яго прайшло добра, але ўсё роўна яму вельмі хацелася ў школу. «Настрой сёння святочны. Рады таму, што сустрэнуся з аднакласнікамі. Бо летам рэдка атрымлівалася іх убачыць. Цікава, што ў іх адбылося новага», - расказаў ён.

У класе Аляксандра вучыцца 13 чалавек. Клас, прызнаецца школьнік, у іх вельмі дружны. «Вучобе таксама рады - на гэты год настроены плённа працаваць, рыхтавацца да будучых экзаменаў. Планую паступаць на праграміста ў БДУІР. Гэты напрамак мне падабаецца, па школьнай праграме ўсё атрымліваецца», - прызнаўся ён.

Побач з выпускнікамі на лінейцы стаялі і першакласнікі. Дзеці вельмі хваляваліся, але малышы прызналіся, што ў школу ім вельмі хочацца. Вадзім Шамоўскі прыйшоў на лінейку з букетам кветак, у белай кашулі. Ён нават паспеў пазнаёміцца з аднакласнікамі. «Вельмі хочацца пайсці ў школу. Хачу вывучаць матэматыку, беларускую мову, а яшчэ знайсці новых сяброў. А яшчэ хачу вучыцца, займацца, атрымліваць добрыя адзнакі. У нас у школе ёсць басейн, буду ў ім плаваць», - расказаў аб планах хлопчык.

У гэтым годзе за парты ў Аўсянкаўскай сярэдняй школе селі больш за 100 вучняў. Школа ў Аўсянцы сустрэла дзяцей абноўленай - да новага навучальнага года тут правялі касметычны рамонт. Капітальны рамонт быў зроблены два гады таму. Тады тут замянілі дах, устанавілі новыя вокны, абнавілі ўваходную групу. Акрамя знешніх работ, у школе замянілі электраправодку і вентыляцыю. Асобная ўвага была ўдзелена спартыўнай зале, у якой пакладзена новае гамагеннае пакрыццё, адрамантаваны раздзявалкі і ўстаноўлены сучасныя душавыя. У школе працуе сучасны басейн.

БЕЛТА