Інструктыўна-метадычны семінар па правядзенні адзінага дня інфармавання прайшоў у Магаблвыканкаме

Інструктыўна-метадычны семінар у рамках адзінага дня інфармавання правёў сёння ў Магілёўскім аблвыканкаме намеснік начальніка галоўнага ўпраўлення ідэалагічнай работы і па справах моладзі Алег Пішчанка.

Удзел у ім прынялі кіраўнікі структурных падраздзяленняў аблвыканкама, члены абласных інфармацыйна-прапагандысцкіх груп аблвыканкама, члены Каардынацыйнага савета грамадскіх аб'яднанняў і палітычных партый Магілёўскай вобласці, прадстаўнікі працоўных калектываў структурных падраздзяленняў аблвыканкама. У студыях рэгіёнаў - сябры раённых інфармацыйна-прапагандысцкіх груп.

Сустрэча адбылася напярэдадні адзінага дня інфармавання, які пройдзе 17 ліпеня. Тэма адзінага дня інфармавання ў гэтым месяцы – «Беларусь суверэнная: ад аднаўлення народнай гаспадаркі да інавацыйных праектаў будучыні».

Аб сучаснай Беларусі, якая прайшла найскладаны шлях ад аднаўлення народнай гаспадаркі ў пасляваенныя гады да заваявання космасу і атрыманні статуту ядзернай дзяржавы, распавёў лектар Магілёўскай абласной арганізацыйнай структуры РДГА «Беларускае таварыства «Веды», дэкан факультэта кіравання і інавацый МАВУ «Беларуска-Расійскі універсітэт», кандыдат фізіка-матэматычных навук, дацэнт Ілля Макавецкі.

Падагульняючы сваё выступленне, ён падкрэсліў: «Можна сказаць, Беларусь, якая двойчы паўстала з попелу, змагла дабіцца каласальных поспехаў, дзякуючы мудрасці беларускага лідара і працавітасці, розуму беларускага народа. Захаваўшы савецкія традыцыі і прымножыўшы іх сучаснымі тэхналогіямі, мы працягваем рухацца далей. Беларусь - гэта сучасная дзяржава. Мы не затрымаліся ў мінулым стагоддзі, мы развіваем тэхналогіі, якія ёсць у арсенале не ў кожнай з развітых краін. Застаецца пытанне, што тады ёсць незалежнасць і суверэнітэт? Закладам незалежнасці і суверэнітэту, на мой погляд, з'яўляецца народнае адзінства. Што мы ў чарговы раз убачылі пасля нашэсця на наш рэгіён урагану, калі, закасаўшы рукавы, мы ўсім светам выйшлі ў двары. І гэта вельмі паказальна. Таму што мы выступаем за Беларусь і яе росквіт».

Юлія Таранава, фота аўтара