Каля 120 студэнтаў факультэта механізацыі сельскай гаспадаркі Беларускай дзяржаўнай сельскагаспадарчай акадэміі дапамагаюць на ўборачнай гаспадаркам Магілёўскай і Віцебскай абласцей. Пра гэта расказаў дэкан факультэта Уладзімір Гусараў.
«Сёлета дапамагаць сельгасарганізацыям адправіліся студэнты 1-3-х курсаў – усяго каля 120 чалавек. І займаюцца нашы хлопцы рознай працай: ад слесара да памочніка камбайнера. Так, напрыклад, некалькі нашых першакурснікаў, у якіх ужо ёсць пасведчанні машыністаў-трактарыстаў, адправіліся ў Глускі раён у ЗАТ «БНБК». Раён далёкі, самі хлопцы не глускія. Таму для іх гэта не толькі прафесійны вопыт, але і магчымасць змяніць становішча, паспрабаваць сябе ў самастойным жыцці далёка ад дома», – адзначыў Уладзімір Гусараў.
Дапамагаць гаспадаркам падчас пасяўной і ўборачнай – даўняя традыцыя ў сельскагаспадарчай акадэміі. «Кожны год нашы хлопцы выязджаюць на працы ў палі. Так яны не толькі набіраюцца вопыту, але і могуць падзарабіць за час канікул да новага навучальнага сезона. Гэта сур’ёзная дапамога, – адзначыў ён. – Нашы студэнты ўдзельнічаюць у пасяўной і на ўборачнай. Падчас гарачай пары рукі заўсёды патрэбныя. І дапамога студэнтаў – важкі ўклад у важную для ўсёй краіны справу».
Як расказаў Уладзімір Гусараў, кожны год у акадэмію паступае вялікая колькасць заявак ад сельскагаспадарчых арганізацый: «Заявак ад сельгасарганізацый для накіравання да іх студэнтаў штогод паступае больш, чым у нас ёсць хлопцаў. Гэта сведчыць пра тое, што такая дапамога запатрабаваная і актуальная як для прадпрыемстваў, якія атрымліваюць на сезон дадатковыя кадры, так і для саміх студэнтаў. Мы ж з боку акадэміі падбіраем для хлопцаў найлепшыя варыянты. Старанна сочым за тым, каб іх забяспечвалі ўсім неабходным».
У такім цесным узаемадзеянні акадэміі і сельгаспрадпрыемстваў ёсць яшчэ адзін плюс. За час навучання студэнты могуць знутры пазнаёміцца з рознымі гаспадаркамі. І калі студэнту спадабалася месца працы, а кіраўніцтву – новы работнік, ужо пасля выпуску ён можа прыйсці туды працаваць.
Факультэт механізацыі сельскай гаспадаркі быў утвораны ў 1947 годзе.
Пры выкарыстанні матэрыялаў актыўная гіперспасылка на mogilev-region.gov.by абавязковая
