Калядныя абрады і канцэрт збяруць магіляўчан на свяце ў Падміколлі

Вялікае каляднае свята пройдзе ў гарадскім парку Падміколле ў Магілёве 7 студзеня. Пра гэта расказалі ў гарадскім цэнтры культуры і адпачынку.

Вялікая святочная праграма «Каляды ў Падміколлі» пачнецца ў 12.00. «Для гасцей свята падрыхтавалі цікавую і разнастайную праграму. Яе падбіралі так, каб яна спадабалася і дзецям, і дарослым», - адзначыла рэжысёр мерапрыемства Вольга Дзмітрачкова.

У калядны дзень у гарадскім парку можна будзе сустрэць калядоўшчыкаў, паглядзець святочны канцэрт і элементы калядных абрадаў, а таксама паўдзельнічаць у розных актыўнасцях. Абяцаюць арганізатары і шмат сюрпрызаў ад вядучых прадпрыемстваў горада. Акрамя гэтага госці свята змогуць пачаставацца гарачай гарбатай і салдацкай кашай. Тут жа будуць працаваць аб'екты грамадскага харчавання.

Свята ў парку працягнецца да 16.00.

БЕЛТА