Рус Бел Eng 中文

Камунальнікі Магілёва гатовыя да зімовых пагодных сюрпрызаў

Магілёў цалкам гатовы да пагодных сюрпрызаў зімы: у горадзе нарыхтавана 70% неабходнай пясочна-салянай сумесі. Пра гэта расказаў намеснік старшыні Магілёўскага гарвыканкама Андрэй Маскалёў.

«Зараз камунальнымі прадпрыемствамі горада нарыхтавана 70% пясочна-салянай сумесі. Для складання яшчэ 30% ёсць усе інгрэдыенты. Каб захаваць іх актыўнасць, у далейшым іх будуць змешваць па меры неабходнасці. Патрэбную колькасць пясочна-салянай сумесі вызначалі зыходзячы з паказчыкаў мінулага года. Тады зіма была капрызнай, камунальным службам горада даводзілася працаваць практычна кругласутачна», – адзначыў Андрэй Маскалёў.

Сёлета камунальныя службы Магілёва нарыхтуюць амаль 22 тыс. т пясочна-салянай сумесі.

«Нарыхтоўка сумесі пачалася ў канцы лета і ўсё яшчэ працягваецца. На гэты момант наша прадпрыемства падрыхтавала 16 тыс. т, усяго трэба 20 тыс. т. Як паказала практыка мінулых гадоў, такой колькасці дастаткова, каб пазбегнуць іншых сюрпрызаў. Акрамя таго, на гарадскіх дарогах у зімовы перыяд будзе працаваць 14 адзінак тэхнікі», – расказаў дырэктар МГКУ «Дарожна-маставое прадпрыемства» Андрэй Клімаў.

Дарожна-маставое прадпрыемства абслугоўвае гарадскія аўтамабільныя артэрыі. Дваровыя і прыдамавыя ўчасткі абслугоўваюцца Кастрычніцкім і Ленінскім КУП ЖРЭУ, якія самастойна нарыхтоўваюць супрацьгалалёдныя сродкі. «Для бяспечнай зімы ў Кастрычніцкім раёне Магілёва наша прадпрыемства ўжо нарыхтавала 430 т пясчана-салянай сумесі. Яе колькасць мы захавалі на ўзроўні мінулага года. У дварах раёна будуць працаваць дзевяць адзінак тэхнікі. Штодня на працу выходзяць 197 рабочых па комплекснай уборцы і ўтрыманні домаўладанняў», – расказала в. а. дырэктара КУП ЖРЭУ Кастрычніцкага раёна Таццяна Касаткіна.

Як расказаў намеснік дырэктара па добраўпарадкаванні ЖРЭУ Ленінскага раёна Магілёва Віктар Гурскі, камунальнае прадпрыемства цалкам гатова да зімы. «Мы падрыхтавалі 1,2 тыс. т пясчана-салянай сумесі. Гэта на 30% больш, чым летась. У нас ёсць 14 машын, якія будуць працаваць у дварах і на прыдамавых тэрыторыях зімой. Ёсць цяжкая тэхніка. У штаце лічыцца 221 рабочы па комплекснай уборцы і ўтрыманні домаўладанняў», – адзначыў ён.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая