КДК Магілёўскай вобласці падвёў вынікі «гарачай лініі» з насельніцтвам па праблемах у сферы аховы здароўя

У Камітэце дзяржкантролю Магілёўскай вобласці правялі «гарачую лінію» па пытаннях якасці медабслугоўвання ў дзяржаўных арганізацыях аховы здароўя.

Усяго паступіў 71 званок, у тым ліку ад жыхароў абласнога цэнтра – 31 зварот.

Амаль трэць грамадзян прасіла растлумачыць абгрунтаванасць іх накіравання на платныя абследаванні. Таксама жыхары вобласці звярнулі ўвагу кантралёраў на недахоп урачоў вузкай спецыялізацыі і талонаў на прыём да ўрача ў дзень звароту, немагчымасць правядзення асобных абследаванняў з прычыны няспраўнасці медыцынскага абсталявання, іншыя праблемы і недахопы ў працы ўстаноў аховы здароўя.

Усе звароты накіраваныя для разгляду па кампетэнцыі, у тым ліку і ў галоўнае ўпраўленне па ахове здароўя Магілёўскага абласнога выканаўчага камітэта. Іх разгляд узяты Камітэтам на кантроль.