Кіраўніцтва аблвыканкама падчас суботніка зоймецца азеляненнем тэрыторыі паблізу сярэдняй школы № 45 Магілёва

Кіраўніцтва аблвыканкама падчас рэспубліканскага суботніка зоймецца азеляненнем тэрыторыі паблізу сярэдняй школы № 45 Магілёва. 25 красавіка тут высадзяць каля 100 туй і іншых дрэў.

Большасць работнікаў аблвыканкама, яго структурных падраздзяленняў будзе прыбіраць смецце і лістоту ў Зялёным гаі і Пячэрскім лесапарку. Спецыялісты Камітэта па сельскай гаспадарцы і харчаванні зоймуцца пабелкай пладовых дрэў у садзе Бялыніцкага СВК «Калгас “Радзіма”». Таксама плануецца ўдзел у добраўпарадкаванні і ўборцы тэрыторый Магілёўскай абласной дзіцячай бальніцы, абласнога цэнтра алімпійскага рэзерву па конным спорце і сучасным пяцібор’і, аздараўленчага цэнтра «Чайка», поймы ракі Дзебра, пасадцы дрэў у населеных пунктах Палыкавіцкага сельскага савета і інш.

Падключацца да суботніка і рэгіёны. Напрыклад, у Кіраўскім раёне асноўным аб’ектам стане мемарыял у вёсцы Боркі, у Бялыніцкім раёне арганізуюць уборку тэрыторыі мемарыяльнага комплексу ў вёсцы Стэфанава. У Бабруйскім раёне ў аграгарадку Варатынь валанцёры БРСМ зоймуцца добраўпарадкаваннем скульптурнай кампазіцыі землякам, якія загінулі ў перыяд Вялікай Айчыннай вайны, а ў гарадскім пасёлку Глуша – «Журботная маці», усталяванай у гонар загінулых мясцовых жыхароў. У Горацкім раёне каля вёскі Слабада моладзь навядзе парадак ля помніка невядомаму, а ў вёсцы Дубінка Магілёўскага раёна – добраўпарадкуюць Курган Славы. У Клімавічах і Краснаполлі запланавана пасадка дрэў.

Заробленыя грошы праз раённыя і гарадскія выканаўчыя камітэты будуць пералічаныя спачатку ў аблвыканкам. Затым 50% ад сумы накіруюць у Міністэрства фінансаў. Гэтыя сродкі ў роўных долях накіроўваюцца Нацыянальнаму мастацкаму музею і Гомельскаму аблвыканкаму для рэканструкцыі братняга пахавання на месцы спаленай вёскі Ала ў Светлагорскім раёне. Суму, якая застанецца ў распараджэнні аблвыканкама, плануюць выдаткаваць на падрыхтоўку дзіцячых аздараўленчых лагераў да летняга сезона, у тым ліку на развіццё і ўмацаванне іх матэрыяльна-тэхнічнай базы, а таксама на добраўпарадкаванне населеных пунктаў, рамонт, рэканструкцыю і аднаўленне мемарыяльных комплексаў, месцаў баявой і вайсковай славы часоў Вялікай Айчыннай вайны.