Кітайскі Новы год сустрэнуць у пачатку лютага ў МДУ імя А. А. Куляшова

Кітайскі Новы год сустрэнуць у Магілёўскім дзяржаўным універсітэце імя А. А. Куляшова. Пра гэта паведамілі ў Цэнтры кітайскай мовы і культуры Інстытута павышэння кваліфікацыі і перападрыхтоўкі кадраў ВНУ.

«Новы год па кітайскім календары наступіць 5 лютага. Лічыцца, што ў гэты дзень зіма сустракае вясну і пачынаецца новы жыццёвы цыкл, – адзначылі суразмоўцы. – З даўніх часоў урачыстасць з’яўляецца галоўнай і самай працяглай у Кітаі і іншых краінах Усходняй Азіі. Мы таксама вырашылі ярка сустрэць свята вясны, падрыхтаваўшы насычаную культурную праграму для навучэнцаў і гасцей ВНУ».

З 4 па 8 лютага ў сценах МДУ імя А. А. Куляшова будуць праходзіць мерапрыемствы. Прычым, на кожны дзень вызначана свая тэма. Так, у панядзелак запланавана лекцыя-прэзентацыя «Свята вясны ў Кітаі». 5 лютага адбудзецца сустрэча з урачамі па рэфлексатэрапіі Цэнтра традыцыйнай кітайскай медыцыны. Наступны дзень будзе прысвечаны «Кітайскай кухні», у прыватнасці, падрыхтоўцы дамплінгаў (страва з тонкага цеста з рознымі начынкамі з мяса, рыбы, гародніны, морапрадуктаў). 7 лютага студэнтаў навучаць мастацтву каліграфіі і завязванню кітайскіх вузлоў. Завершыцца свята ў пятніцу музычна-гульнявой праграмай.