Ключавыя аспекты «Вялікай размовы з Прэзідэнтам» абмеркавалі сёння ў Магілёўскім аблвыканкаме

Сёння ў Магілёўскім абласным выканаўчым камітэце ў межах Адзінага дня інфармавання адбылася сустрэча старшыні праўлення ЗАТ «Другі нацыянальны тэлеканал» Марата Маркава з кіраўнікамі і прадстаўнікамі структурных падраздзяленняў аблвыканкама, абласных службаў, намеснікамі кіраўнікоў па ідэалагічнай працы прадпрыемстваў Магілёва.

Марат Маркаў з першых хвілін пазначыў фармат зносін як адкрыты дыялог з адказамі на пытанні.

Падчас сустрэчы абмяркоўваліся асобныя тэмы «Вялікай размовы з Прэзідэнтам». Спікер падзяліўся асабістымі ўражаннямі па канкрэтных пытаннях, на якія, на яго думку, варта звярнуць увагу.

Марат Маркаў адзначыў невыпадковасць абранай для Вялікай размовы даты. Роўна год прайшоў з моманту выбараў Прэзідэнта Беларусі: «Асабіста для мяне жыццё «да» і «пасля» вельмі адрозніваецца. Што тычыцца СМІ, то ёсць унутранае адчуванне, што мы ў нейкай ступені страцілі той спакой і бясхмарнае жыццё. Мы ніколі не працавалі ў такой сітуацыі, якая склалася непасрэдна ў дзень выбараў і некалькі месяцаў пасля. Нам не хапіла навыкаў. Сёння мы б ужо дзейнічалі па-іншаму. Але інфармацыя, якую ўкідвалі телеграм-каналы адносна таго, якая колькасць журналістаў сышла з дзяржаўных СМІ, аказалася непраўдзівай. Што тычыцца непасрэдна нашага канала, то на працягу некалькіх месяцаў сышлі 38 чалавек з 400. Некаторыя з іх цяпер просяцца назад. На гэты конт мая пазіцыя прамая: калі чалавек прытрымліваецца недзяржаўных поглядаў, ён не можа працаваць на дзяржаўным канале і атрымліваць за кошт дзяржаўнага канала зарплату!»

На думку Марата Маркава, тое, што адбылося пасля выбараў, неабходна дакладна прааналізаваць: дзе была дапушчана памылка, што зроблена няправільна, дзе недапрацавалі, для таго каб пасля такія рэчы не паўтарыліся.

«Сітуацыя, якая склалася ў краіне, нагняталася штучна на працягу многіх гадоў, – адзначыў спікер. – І цяпер мы бачым факты, якія пацвярджаюць гэта фінансаванае насаджэнне. Нездарма многія телеграм-каналы прызнаныя экстрэмісцкімі. Яны працавалі за кошт фінансавання польскага боку і зусім канкрэтна працавалі на падрыў нашай дзяржавы».

Таксама Марат Маркаў закрануў самыя папулярныя тэзісы «Вялікай размовы з Прэзідэнтам». Адзін з іх тычыцца санкцый: «Пакуль мы не загналі адзін аднаго ў кут, выходзіць з гэтай сітуацыі трэба цяпер. Але мяч на тым баку».

Яшчэ адна тэма, якая атрымала шырокае асвятленне, – інтэграцыя і ўзаемаадносіны з Расіяй.

Датычна гэтага пытання адзін з тэзісаў Прэзідэнта прагучаў так: «Галоўнае ва супрацоўніцтве – прыстойнасць!».

– У любым выпадку інтэграцыя магчымая і павінна быць. Але, у адрозненне ад меркавання шэрагу расійскіх экспертаў, якія навязваюць пэўную форму «калі Беларусь не ўваходзіць у склад РФ, значыць гэта не інтэграцыя», трэба разумець самае галоўнае, што паглынанне – не роўна інтэграцыя. Абсалютна не трэба ні беларускаму, ні расійскаму кіраўніцтву, каб наша краіна была ў складзе Расіі, – пракаментаваў Марат Маркаў. – Іншая справа саюз. Прэзідэнт правільна падкрэсліў, што пачынаць трэба з саюзнай Канстытуцыі.

Самы вялікі блок быў прысвечаны пытанням замежных журналістаў. Як адзначыў Марат Маркаў, усе зададзеныя імі пытанні былі ідэнтычныя – мірныя акцыі, арышты, катаванні і палітвязні: «Калі людзі задаюць пытанне пра палітвязняў, не разумеючы паняцця і значэння гэтага слова, то далей размаўляць няма пра што. Калі чалавек парушае закон, ён не можа быць палітвязнем. Мы павінны выразна разумець, што закон павінен выконвацца да тых часоў, пакуль ён не памяняецца. Інакш будзе хаос».

Дастаткова многа часу было нададзена інфармацыйнай прасторы. Абмяркоўваліся таксама тэмы бяспекі на беларускай мяжы, сітуацыя з бежанцамі, украінскія пытанні, адносіны да людзей, якія заклікаюць заходнія краіны да санкцый супраць сваёй краіны, а таксама што трэба рабіць, каб не страціць маладое пакаленне і многія іншыя.

У фінале выступлення Марат Маркаў агучыў свае адносіны да Прэзідэнта Беларусі Аляксандра Лукашэнкі: «Маё асабістае меркаванне, што наш Прэзідэнт – гэта лідар! За ім – як за каменнай сцяной. Ён прафесійны. Заўсёды ведае, што робіць і кажа. Яго меркаванне аргументаванае, што немалаважна. І, самае галоўнае, ён – патрыёт краіны!»

Галіна Гаўрыловіч, фота аўтара