Конкурс на самую лепшую аграэкасядзібу аб’яўлены ў Беларусі

ААТ «Белаграпрамбанк» і прадпрыемства «Аграбізнескансалт» аб’яўляюць аб старце рэспубліканскага конкурсу «Найлепшая аграсядзіба года». Пра гэта паведамілі ва ўпраўленні маркетынгу і грамадскіх сувязяў банка.

Рэспубліканскі конкурс праводзіцца з мэтай аказання інфармацыйнай падтрымкі суб’ектам аграэкатурызму, фарміравання спрыяльных умоў для іх развіцця. Па выніках дзейнасці аграсядзіб за 2017 год будуць выяўлены пераможцы ў асноўных намінацыях «Спорт і здароўе», «Этнакультура», «Экасядзіба», «Інавацыйны падыход» і ў дадатковых – «Народны выбар», «Прызнанне», «Гран-пры».

Для таго каб прыняць удзел у спаборніцтвах за званне «Найлепшая аграсядзіба года», прэтэндэнтам неабходна падаць на адрас «Аграбізнескансалта» заяўку на ўдзел у конкурсе, 6-9 фотаздымкаў і відэаролік, які адлюстроўвае адпаведнасць удзельніка неабходным крытэрыям, копію дакумента аб выплаце збору за ажыццяўленне дзейнасці па аказанні паслуг у сферы аграэкатурызму ў год правядзення конкурсу. Заяўкі прымаюцца з 8 па 31 жніўня.

З правіламі і ўмовамі конкурсу «Найлепшая аграэкасядзіба года» можна азнаёміцца на сайце Белаграпрамбанка.

БЕЛТА