Конкурс патрыятычнай песні «Сэрцам прывязаныя» праходзіць у Магілёўскай вобласці

Адкрыты конкурс патрыятычнай песні «Сэрцам прывязаныя» праходзіць у Магілёўскай вобласці. Пра гэта расказаў намеснік старшыні Магілёўскай абласной арганізацыі «Беларускі саюз ветэранаў вайны ў Афганістане» Валерый Ваньковіч.

Паводле яго слоў, сёлета ўпершыню за гісторыю творчага спаборніцтва ўзрост удзельнікаў не абмежаваны. «Адкрыты рэгіянальны конкурс у гэтым годзе пройдзе ўжо шостым разам. І мы вырашылі не абмяжоўваць узрост удзельнікаў, а разбіць іх на дзве катэгорыі. Малодшая – ад 14 да 25 гадоў. Старэйшая – ад 25 гадоў і больш. Конкурс праводзіцца сярод ансамбляў і салістаў устаноў агульнай сярэдняй адукацыі, дадатковай адукацыі дзяцей і моладзі, прафесійна-тэхнічнай і сярэдняй спецыяльнай адукацыі, працоўных калектываў прадпрыемстваў і арганізацый, – расказаў Валерый Ваньковіч. – Традыцыйна вялікая частка канкурсантаў – падлеткі і моладзь. У старэйшай групе выступаюць часта тыя, хто служыў у Афганістане ў перыяд ваенных дзеянняў. Яны не па чутках ведаюць пра тыя падзеі, што тады адбываліся. І іх творчыя нумары заўсёды трапляюць у самае сэрца. Малодшыя хлопцы часцей выконваюць ваенныя, патрыятычныя песні. Гэта заўсёды кранальна».

Праводзіцца творчае спаборніцтва ў некалькіх намінацыях: найлепшы вакаліст, ансамбль і выканаўца песень перыяду вайны ў Афганістане 1979–1989 гадоў.

Для ўдзелу ў конкурсе неабходна даслаць відэаролік з запісам выканання творчага нумара. Хранаметраж – да 5 хвілін. Работы прымаюцца на электронную пошту bsvvamogilev@tyt.by да 22 лістапада.

«Праз няпростую эпідэміялагічную абстаноўку фінал конкурсу ў гэтым годзе пройдзе ў завочным фармаце. Аднак мы спадзяёмся, што ў наступным годзе ў нас атрымаецца правесці творчае спаборніцтва ў поўным аб’ёме», – падзяліўся Валерый Ваньковіч.

БЕЛТА