Конкурсы, песні і выстава-продаж. Фестываль народнай творчасці «Глушанскі хутарок» пройдзе ў Бабруйскім раёне

Рэгіянальны фестываль народнай творчасці і рамёстваў «Глушанскі хутарок» пройдзе 12 кастрычніка ў пасёлку Глуша Бабруйскага раёна. Аб гэтым паведамілі ў Магілёўскім абласным метадычным цэнтры народнай творчасці і культурна-асветнай работы.

Фестываль стартуе ў 11.00. У яго праграму ўвайшлі раённы конкурс на лепшую тэатралізаваную прэзентацыю абрадаў «Вяртанне да вытокаў», пленэр па кераміцы і ганчарстве, конкурс-выстава нацыянальнай беларускай кухні, конкурсы гульнявых праграм сярод удзельнікаў клубных фарміраванняў і беларускай песні «Люблю цябе, Белая Русь».

На фестывальнай сцэне са сваімі нумарамі выступяць мясцовыя і запрошаныя творчыя калектывы, якія будуць ствараць настрой і непаўторную атмасферу беларускай гасціннасці. Гасцей мерапрыемства парадуюць выстава-продаж сельскагаспадарчай прадукцыі і гандлёвыя рады майстроў.

Арганізатары адзначаюць, што фестываль садзейнічае захаванню і развіццю традыцыйнай беларускай культуры, папулярызацыі фальклору і народных рамёстваў, рэалізацыі творчых здольнасцей удзельнікаў.

БЕЛТА