RU BY EN 中文
Twitter Instagram

Крэатыўныя праекты рэалізуюць у Магілёве выпускнікі школы гарадскіх ініцыятыў «Цяпліца»

Крэатыўныя праекты рэалізуюць у Магілёве выпускнікі чацвёртага сезона школы гарадскіх ініцыятыў «Цяпліца». Пра гэта паведаміў кіраўнік Цэнтра гарадскіх ініцыятыў Юрый Стукалаў.

Адна з задумак –«Гарадок»– не ўнікальная ў сваім родзе, але будзе цікавая для жыхароў абласнога цэнтра. Яе сутнасць – стварэнне ў цэнтры Магілёва інтэрактыўнай гульнявой пляцоўкі. Тут усе жадаючыя змогуць пагуляць у настольны тэніс, дваровыя гульні (класікі, твістар і інш.), патанцаваць на асфальце і пачытаць цікавую кнігу.

Да Дня горада маюць намер рэалізаваць праект «Мапа Maps». Каманда аўтараў распрацуе і прэзентуе незвычайную турыстычную карту па самых цікавых месцах горада. «Дзякуючы своеасаблівай размалёўцы магіляўчане змогуць правесці гасцей абласнога цэнтра па прадуманым шляху. У далейшым плануецца выданне тэматычных карт з сезоннымі маршрутамі», – удакладніў Юрый Стукалаў.

Яшчэ адна ініцыятыва –«Душа двара». Плануецца, што стрыт-арт мастакі размалююць фасады дамоў. Задумка заклікана змяніць гарадскія двары і напоўніць іх яркімі фарбамі, развіць лакальны патрыятызм у гараджан.

З мая пачнецца рэалізацыя праекта па захаванні гісторыка-культурнай спадчыны «Подых мінулага». Яго сутнасць – у візуалізацыі гістарычных аб’ектаў Магілёва, якіх ужо няма. У горадзе з’явяцца стэнды з QR-кодамі, фота і апісаннем страчаных помнікаў архітэктуры.

«Летні сезон – добры час для старту ініцыятывы “Пешаходка”», – сказаў Юрый Стукалаў. – Гараджанам і гасцям сталіцы Прыдняпроўскага краю прапануюць пазнаёміцца з маладымі талентамі, а апошнім – выступіць перад гледачамі». Па пешаходнай вуліцы Ленінскай плануецца стварыць 6 пляцовак для выступлення кавер-бэндаў, бардаў, паэтаў, а таксама пачаткоўцаў і дасведчаных танцораў розных стыляў.

Дарэчы, у гэтым сезоне «Цяпліца» пашырыла геаграфію: адбыўся выязны семінар у Бабруйску, сустрэчы ў Горках і Клімавічах.

«Колькасць і якасць ідэй, прапанаваных да рэалізацыі жыхарамі абласнога цэнтра, слухачамі «Цяпліцы» штогод павялічваецца. Нас радуе такая тэндэнцыя, паколькі відаць, што гараджане любяць Магілёў, – адзначыў Юрый Стукалаў. – Упэўненыя: усё запланаванае будзе рэалізавана і прынясе карысць нашаму краю».

Пры выкарыстанні матэрыялаў актыўная гіперспасылка на mogilev-region.gov.by абавязковая