Крычаўскія воіны-інтэрнацыяналісты дапамаглі расіяніну адшукаць магілу дзеда, які загінуў у гады Вялікай Айчыннай вайны

Лёсы родных, загінулых у гады Вялікай Айчыннай вайны, для многіх сем’яў былога СССР дзесяцігоддзямі заставаліся таямніцай. Таямніцай было і месца пахавання дзеда расіяніна Алега Кошалева – жыхара горада Пераслаўль-Залескі Яраслаўскай вобласці, кіраўніка Яраслаўскага абласнога аддзялення Усерасійскай арганізацыі «Баявое Братэрства». Родны яму чалавек загінуў у 1944 годзе, пра гэта паведамлялася ў пахаванцы, якую паштальён даставіў яго бабулі. Але дзе пахаваны радавы пехацінец Канстанцін Іванавіч Кошалеў, было невядома. У пасляваенныя гады родныя шукалі яго магілу. Але ўсё было безвынікова. Некаторы час таму Алег Кошалеў напісаў на сайт аднаго з пошукавых атрадаў Мінска. Не адразу, але яму адказалі, што яго дзед пахаваны ў Магілёўскай вобласці, у Крычаўскім раёне ў брацкай магіле, якая знаходзіцца ў вёсцы Палоніца. Гэта было ў мінулым годзе, але тады ўвесь свет ахапіла пандэмія і выехаць ён за мяжу сваёй краіны не мог. Таму паспрабаваў пабываць на магіле дзеда ў гэтым годзе, пра гэта вельмі прасіла яго маці – дачка Канстанціна Іванавіча. Лёс упадабаў расіяніна, і яго прапусцілі праз мяжу. Перад гэтым ён звязаўся са старшынёй раённай арганізацыі «Беларускі саюз ветэранаў вайны ў Афганістане» Іванам Ларывонавым і папрасіў яго дапамагчы з пошукам брацкай магілы. Крычаўлянін адгукнуўся на просьбу.

Помнік на брацкай магіле ў Палоніцы адшукалі без працы. Ён быў усталяваны ў 1967 годзе. Тут пахавана 124 савецкія воіны, якія загінулі ў гады вайны, у тым ліку 40 невядомых.

Алег Кошалеў, воіны-інтэрнацыяналісты Іван Ларывонаў з Аляксандрам Зімніцкім усклалі чырвоныя гваздзікі да брацкай магілы. Ля помніка была пакінута зямля, прывезеная з Пераслаўля-Залескага. Некалькі жмень беларускай зямлі наш госць забраў з сабой.

У Крычаве госць усклаў кветкі да Кургана Славы, памятнага знака, прысвечанага стагоддзю пагранічнай службы, помніка воінам-інтэрнацыяналістам, а таксама да помніка Мікалаю Сірацініну ў Сакольнічах.

Алегу Кошалеву спадабаўся наш горад – чысціня і парадак. Таксама ён адзначыў дагледжаныя палі мясцовых гаспадарак.

– Вялікі дзякуй Івану Ларывонаву, – у завяршэнні паездкі падзякаваў расіяніну за прыём. – Ён мяне сустрэў і аказаў дапамогу ў пошуках. Мяне таксама прыемна здзівіла тое, што помнік знаходзіцца ў добрым стане і дагледжаны. У выдатным стане і іншыя помнікі ў горадзе. Гэта сведчыць пра тое, што ў вас памятаюць герояў Вялікай Айчыннай вайны і ўшаноўваюць іх памяць. А гэта наша агульная гісторыя, якая аб’ядноўвае народы.

k-j.by