Леанід Мартынюк: задача ўлады ўсіх узроўняў – ствараць для грамадзян бяспечныя і камфортныя ўмовы жыцця і працы

Задача ўлады ўсіх узроўняў – ствараць для грамадзян бяспечныя і камфортныя ўмовы жыцця і працы. Такім меркаваннем падзяліўся памочнік Прэзідэнта – інспектар Магілёўскай вобласці Леанід Мартынюк, падводзячы вынікі асабістага прыёму грамадзян, які прайшоў сёння ў Клічаўскім райвыканкаме.

«Кожны рэгіён мае пэўную спецыфіку. Клічаўскі раён – сельскагаспадарчы і адзін з найбуйнейшых у Магілёўскай вобласці. І, безумоўна, людзі, якія жывуць у горадзе, аграгарадку ці любым іншым населеным пункце, павінны мець камфортныя і бяспечныя ўмовы жыцця, – адзначыў ён. – Задача ўлады на ўсіх узроўнях зводзіцца да таго, каб забяспечваць для людзей гэтыя базавыя патрэбы. Безумоўна, гэта праца шмат у чым кладзецца на прадпрыемствы, якія ствараюць камфортныя ўмовы жыцця людзей. Гэта і ЖКГ, і водаканал, энергетыкі і газавыя службы, якія на сённяшні дзень у нас працуюць у межах існуючага заканадаўства і не дапускаюць яго парушэнняў».

Па словах памочніка Прэзідэнта – інспектара па Магілёўскай вобласці, прыёмы грамадзян, у тым ліку і той, што прайшоў сёння ў Клічаве, характарызуюць працу ўсіх службаў раёна. «Большасць пытанняў, якія сёння закраналіся жыхарамі Клічаўскага раёна, датычацца камфортных умоў пражывання, – адзначыў Леанід Мартынюк. – Але і самі грамадзяне павінны ўсведамляць, што тая сістэма, тыя меры, якія прадпрымаюцца, накіраваныя на стварэнне бяспечнага асяроддзя для жыцця».

Таксама Леанід Мартынюк адзначыў, што стварэнне якасных умоў жыцця, прыгажосці ў населеных пунктах і своечасовае навядзенне парадку на тэрыторыях – сумесная праца вялікай колькасці людзей. «Да пытанняў добраўпарадкавання тэрыторыі населеных пунктаў, навядзення парадку неабходна падыходзіць усебакова. Разумная кааперацыя абслугоўвальных ведамстваў і жыхароў у навядзенні парадку на тэрыторыі дае выдатныя вынікі. Таму сумесная праца па ўпрыгожванні любога населенага пункта – гэта сумесная праца мясцовай улады, адказных службаў і жыхароў. І праца гэта выбудоўваецца не за адзін дзень – гэта неабходна выхоўваць у людзях яшчэ з дзяцінства: калі дзеці разам з бацькамі высаджваюць дрэвы або клумбы, даглядаюць за імі. І гэта дзіця вырасце адказным, будзе паважаць чужую працу і стане ў будучыні сапраўдным гаспадаром жыцця», – падкрэсліў ён.

Сярод пытанняў, з якімі звярталіся сёння жыхары раёна на асабісты прыём, – капітальны рамонт дома, стварэнне бяспечных умоў працы. Адзін са зваротаў быў калектыўным: жыхары аднаго са шматкватэрных дамоў Клічава не згодныя з адключэннем у доме газавых воданагравальнікаў. Узамен жыхарам прапануюць ўсталёўваць электранагравальнікі для гарачага водазабеспячэння. Леанід Мартынюк адзначыў, што ўсе пытанні ўзяты на кантроль, кожнае з іх неабходна больш дэталёва вывучыць і ўжо пасля прымаць рашэнні, якія не будуць супярэчыць існуючаму заканадаўству.

«Захаванне працоўнай дысцыпліны, правілаў аховы працы павінны быць не проста прыярытэтнымі напрамкамі ў працы кожнага прадпрыемства і ў цэлым у рэгіёне, яны павінна быць асноватворнымі запаведзямі кожнага кіраўніка любога ўзроўню. За імі – іх супрацоўнікі, іх жыцці і лёсы, – адзначыў памочнік Прэзідэнта – інспектар па Магілёўскай вобласці. – Вопытныя кіраўнікі павінны не толькі ўмець своечасова выяўляць праблемныя месцы, але і пралічваць на некалькі крокаў наперад. Гэта дапаможа ў будучыні нівеліраваць шэраг магчымых праблем, не дапусціць абвастрэння той ці іншай сітуацыі».

БЕЛТА