Летняя спартакіяда дэпутацкага корпуса Магілёўскай вобласці адбылася ў Кіраўскім раёне

Учора адбылося закрыццё спартакіяды дэпутацкага корпуса Магілёўскай вобласці, якая праходзіла ў Кіраўскім раёне 30–31 ліпеня, і ўрачыстае ўшанаванне пераможцаў спаборніцтваў.

На цырымонію ўзнагароджання для ўручэння заслужаных узнагарод былі запрошаны дэпутат Палаты прадстаўнікоў Нацыянальнага сходу Рэспублікі Беларусь Уладзімір Гацко, старшыня Магілёўскай абласной асацыяцыі мясцовых Саветаў дэпутатаў Анатоль Мацюлін і старшыня Кіраўскага раённага Савета дэпутатаў Алена Сакадынец.

Уладзімір Гацко падзякаваў удзельнікам спартакіяды за актыўную жыццёвую пазіцыю, яркія лідарскія якасці, выдатную камандную гульню. Адзначыў высокі ўзровень арганізацыі спартакіяды.

Першае месца ў агульнакамандным заліку занялі прадстаўнікі Магілёўскага гарадскога Савета дэпутатаў. Таксама ў тройку лідараў летняй спартакіяды ўвайшлі каманды Магілёўскага раённага Савета дэпутатаў і Клічаўскага раённага Савета дэпутатаў.

Былі ўзнагароджаны пераможцы спаборніцтваў па валейболе, лёгкай атлетыцы, шашках, настольным тэнісе, у эстафеце, асабістым першынстве па падцягванні і скакалцы, конкурсах мастацкай самадзейнасці і «Трапны футбаліст».

Каманда Кіраўскага раёна стала пераможцай конкурсу мастацкай самадзейнасці, заняла трэцяе месца ў агульнакамадным заліку па настольным тэнісе.

Летняя спартакіяда дэпутацкага корпуса Магілёўскай вобласці праводзілася 12-ым разам і стала сапраўдным святам спорту і здароўя, дружбы і ўзаемадапамогі, творчасці і агульнай радасці.

kirovsk.by