Лясгасы Магілёўскай вобласці плануюць нарыхтаваць 1,5 тысячы тон бярозавага соку

У сезон нарыхтоўкі бярозавага соку ўключылася Магілёўская вобласць. Паўднёвыя лясгасы - Бабруйскі, Асіповіцкі і Глускі - прыступілі да яго збору ў канцы сакавіка, масавая ж нарыхтоўка ў рэгіёне пачалася ў першых чыслах красавіка. Плануецца, што сёлета лясгасы Магілёўскай вобласці нарыхтуюць 1,5 тысячы тон соку.

- Да нарыхтоўкі прыступілі прыкладна на тыдзень пазней, чым у мінулым годзе, адбіліся ўмовы надвор'я. Тады ўдалося нарыхтаваць 1,7 тысячы тон «бярозавіка», - адзначыў намеснік начальнік аддзела вытворчасці і рэалізацыі лесапрадукцыі Магілёўскага ДВЛГА Васіль Шык. - У гэтым годзе лясгасамі вызначаны спецыяльныя ўчасткі для збору соку. Насельніцтва актыўна цікавіцца, як набыць карысны напой. Для гэтага ёсць два варыянты: альбо купіць нарыхтаваны сок, кошт на які адрозніваецца ў залежнасці ад лясгаса, тары, альбо займацца нарыхтоўкай самастойна. У гэтым выпадку трэба звярнуцца ў лясніцтва па месцы жыхарства, дзе чалавеку пакажуць прыдатны для гэтага ўчастак.

У сярэднім нарыхтоўка соку ў рэгіёне доўжыцца каля двух тыдняў. Але гэта ўмоўныя тэрміны, бо ўсё залежыць ад умоў надвор'я. Бывае, што перыяд падаўжаецца і на месяц. Сярод асноўных пакупнікоў соку ў лясгасаў Магілёўскай вобласці прадпрыемствы харчовай прамысловасці: Быхаўскі кансервава-агароднінасушыльны завод, Асіповіцкі кансервавы завод, прадпрыемствы Магілёва, Бабруйска, а таксама Мінска і Смалявіч.

СБ