Лясгасы Магілёўскай вобласці плануюць нарыхтаваць каля 1,5 тыс. т бярозавага соку

Лясгасы Магілёўскага дзяржаўнага вытворчага лесагаспадарчага аб’яднання прыступілі да нарыхтоўкі бярозавага соку. За сезон плануецца сабраць каля 1,5 тыс. т, у тым ліку каля 300 т рэалізаваць насельніцтву.

Кошт бярозавага соку ў лясніцтвах непасрэдна ў лясным фондзе складзе ад 11 да 20 кап. за 1 літр, у двары лясгаса або лясніцтва ад –18 да 30 кап, у 5 літровых бутлях –2 рублі 20 капеек.

З пачаткам сезона нарыхтоўкі бярозавіку дзяржаўная лясная ахова асаблівую ўвагу будзе надаваць ахове бярозавых гаёў і змешаных лясоў, дзе растуць спелыя бярозы, паколькі самавольная нарыхтоўка соку без дазвольных дакументаў у Рэспубліцы забаронена.

Самастойная нарыхтоўка бярозавага соку дазволена толькі пад наглядам работнікаў лясгаса ў спецыяльна адведзеных для гэтага ўчастках ляснога фонду, падкрэслілі ў Магілёўскім дзяржаўным вытворчым лесагаспадарчым аб’яднанні. За парушэнне правілаў нарыхтоўкі соку прадугледжана адміністрацыйная адказнасць згодна з Кодэксам Рэспублікі Беларусь аб адміністрацыйных правапарушэннях:

Згодна з артыкулам 15.26 КаАП нарыхтоўка драўнянага соку на тэрыторыі, дзе такія нарыхтоўкі забароненыя, або збор без дазвольнага дакумента, калі яго атрыманне абавязковае, ці не ў адпаведнасці з ім цягнуць папярэджанне або накладанне штрафу ў памеры да 20 базавых велічынь, на індывідуальнага прадпрымальніка – да 100 базавых велічынь, а на юрыдычную асобу – да 500 базавых велічынь.

Заканадаўствам вызначаны тэрыторыі, на якіх нарыхтоўка драўняных сокаў забараняецца. Да іх адносяцца:

– гарадскія, курортныя лясы і лесапаркавыя часткі зялёных зон;

– прыбярэжныя палосы рэк, азёр, вадасховішчаў і іншых водных аб’ектаў;

– палосы адводу жалезных і аўтамабільных дарог, іншых транспартных і камунікацыйных ліній;

– населеныя пункты;

– дэндралагічныя паркі, батанічныя сады;

– гісторыка-культурныя запаведнікі, мемарыяльныя паркі, археалагічныя помнікі;

– месцы пражывання дзікіх жывёл і росту дзікарослых раслін, аднесеных да відаў, уключаных у Чырвоную кнігу Рэспублікі Беларусь;

– тэрыторыі санаторыяў, дамоў адпачынку, курортаў і ўстаноў аховы здароўя, а таксама акругі і зоны санітарнай аховы курортаў;

– месцы масавага адпачынку насельніцтва.

У мэтах недапушчэння несанкцыянаванай падсочкі бярозавых насаджэнняў у лясніцтвах будуць прымяняцца сродкі фота- і відэафіксацыі.

Па пытаннях нарыхтоўкі і набыцця бярозавага соку неабходна звяртацца ў найбліжэйшае лясніцтва або ў лясгас, адпаведная інфармацыя таксамаразмешчана на інтэрнэт-сайтах лесагаспадарчых устаноў.