Магілёўцаў і гасцей горада 15–16 лістапада запрашаюць на вялікі святочны кірмаш

Магілёўцаў і гасцей горада 15–16 лістапада запрашаюць на вялікі святочны кірмаш. Як паведамілі ў галоўным упраўленні гандлю і паслуг аблвыканкама, ён будзе ўключаць дзве пляцоўкі з гандлёвымі радамі, якія расцягнуцца больш чым на паўкіламетра.

Першая пляцоўка разгорне рады ўздоўж Лядовага палаца. Тут размесціцца 88 гандлёвых аб’ектаў і 400 пасадачных месцаў. Сваю прадукцыю і вырабы прадставіць каля 50 суб’ектаў гаспадарання – вытворцы Магілёўскай вобласці, індывідуальныя прадпрымальнікі, рамеснікі. Яны прапануюць пакупнікам прадукцыю грамадскага харчавання, у тым ліку прыгатаваных на ражне парсючкоў і ягнят, шашлыкі. У шырокім асартыменце будзе прадавацца мясная прадукцыя. Таксама наведвальнікі змогуць набыць швейныя і трыкатажныя вырабы, чай і спецыі, тавары з саломкі і дрэва, сувеніры. Запланаваны дэгустацыі і акцыі па зніжэнні цэн. Дзяцей пачастуюць папкорнам, салодкай ватай і гарачай кукурузай.

У гэтай жа зоне на сцэне выступяць самадзейныя калектывы. Госці свята змогуць зрабіць фота на памяць ля гоначнага грузавіка, які прадставіць беларускі экіпаж у ралі-рэйдзе «Дакар».

Другая пляцоўка – сельскагаспадарчая – будзе працаваць на стаянцы для аўтатранспарту каля Лядовага палаца. Каля 30 суб’ектаў рознай формы ўласнасці прапануюць плодаагароднінную і рыбную прадукцыю.

15 лістапада кірмаш будзе працаваць з 9.00 да 18.00, 16 лістапада – з 10.00 да 16.00. Ён стане часткай рэгіянальнага фестывалю-кірмашу працаўнікоў вёскі «Дажынкі», які пройдзе ў Палацы культуры вобласці.