Магілёўская міліцыя штодзень патрулюе месцы масавага адпачынку

Заўсёды гатовы дапамагчы

Спякотнае надвор'е вабіць беларусаў да рэк і азёр. Каб адпачынак не абярнуўся бядой, праваахоўнікі штодня нясуць службу ў месцах вялікай колькасці людзей. Ахапіць увагай як мага большую тэрыторыю пешым нарадам дапамагае велапатруль, калегі на катэрах і з беспілотнікамі.

У Магілёве на кантролі чатыры ключавыя пункты: Святое возера, гарадскі пляж ля ракі Днепр, парк у Падміколлі і Пячэрскі лесапарк з вадаёмам. У лесапарк і адправіліся нашы карэспандэнты, каб асабіста ўпэўніцца, як забяспечваецца грамадская бяспека.

Будні дзень, але на беразе дастаткова шматлюдна. Нядзіўна - вакацыі, перыяд адпачынкаў. Хтосьці не прапускае магчымасці асвяжыцца ў абедзенны перапынак.

Байцы спецыяльнага батальёна патрульна-паставой службы міліцыі імя Канстанціна Рыгоравіча Уладзімірава УУС Магілёўскага аблвыканкама Вячаслаў Мальцаў і Ілля Станкевіч заступілі на дзяжурства з самай раніцы. Пешы патруль спыняе купанне ў неўстаноўленых месцах, распіццё алкаголю, рознага кшталту канфлікты.

Ілля каментуе:

- Сама наша прысутнасць тут ужо спрыяльна ўплывае на абстаноўку. Патэнцыйныя хуліганы паводзяць сябе стрымана, а добрасумленныя грамадзяне спакойна адпачываюць: разумеюць, што мы ўвесь час на варце, заўсёды гатовыя дапамагчы. Падкрэслю: наша служба не заўсёды пра пакаранне. Больш праца на папярэджанне, каб прадухіліць трагедыю. Зрабіць заўвагу ці проста паразмаўляць, нагадаць аксіёмы бяспекі.

Напрыклад, у поле зроку дзеці без суправаджэння дарослых. Сам быў хлапчуком, разумею, наколькі небяспечным можа быць такая свабода. Наша задача - не дапусціць бяду, наставіць.

Якраз пра гэта міліцыянеры толькі што паразмаўлялі з падлеткамі, якія прыйшлі на пляж адны. Блага толькі загараюць, у ваду не лезуць.

За дзевяцігадовымі Таісіяй і Ксеніяй даглядаюць маці Алеся Каротчанка і Крысціна Волкава.

— Жывем зусім побач, таму на возера ходзім часта. Тым больш зараз канікулы. Да бяспекі дзяцей стаўлюся вельмі адказна. Нават старэйшую дачку адну не адпускаю купацца, хаця ёй 18 гадоў, што ўжо казаць пра малодшую. Цешыць, што наш адпачынак ахоўвае міліцыя. Нам спакайней. Тое, што хлопцы ў форме побач, дысцыплінуе людзей. Ні разу не бачыла канфліктаў, ніхто не дзебашырыць, - дзеліцца Алеся Каротчанка.

Так званыя цяжкадаступныя месцы супрацоўнікі батальёна патрульна-паставой службы аб'язджаюць на катэры. У пошуку аматараў дзікіх пляжаў добра сябе выявіў велапатруль. Жалезныя коні дазваляюць ахапіць вялікую плошчу, каб спыніць адміністрацыйныя правапарушэнні. За змену ў сярэднім хлопцы намотваюць 20 - 25 кіламетраў. Не толькі па пляжах, парках і ў лесапаласе, але і на дваровыя тэрыторыі заязджаюць.

— Мы сваю службу нясем скрытна, у цывільным адзенні, каб не прыцягваць да сябе залішняй увагі, і гэта эфектыўна адбіваецца на выніках, — расказвае Андрэй Дарошка. - Калі кампанія накіравалася ў бок неабсталяваных пляжаў, праз дзесяць хвілін можна смела пад'язджаць і фіксаваць распіццё алкаголю. Інфармацыю перадаю нараду, які нясе службу ў форменным абмундзіраванні, для спынення дадзенага правапарушэння і афармлення дакументаў.

На жаль, частая карціна - дарослыя выпіваюць, захапляюцца і забываюць пра дзяцей, а малыя без нагляду лезуць у ваду. Страшна падумаць, чым гэта можа скончыцца, калі мы не ўмяшаемся.

Прафілактыка, якая праводзіцца міліцыянерамі, дае станоўчыя вынікі, але работу спыняць нельга: як толькі ўстанаўліваецца спякота, каля вадаёмаў адразу наплыў людзей — трэба быць напагатове.

Супрацоўнік батальёна Кірыл Харошча запускае беспілотны лятальны апарат:

- Навінка. Дрон дае шырокі ахоп зоны месцаў масавага адпачынку для маніторынгу. З досведу мінулых гадоў скажу: сярод частых парушэнняў - купанне ў забароненых месцах, распіццё ў грамадскіх месцах алкагольных і слабаалкагольных напояў. Людзі прыходзяць на пляж, спаталяюць смагу спіртным, а пасля іх цягне плаваць. Часцяком гэта становіцца чыннікам здарэнняў. Працуем на апярэджанне, перасцерагаем людзей.

Бывае, парушальнікі заяўляюць, што мы перашкаджаем ім культурна бавіць час», але паверце: міліцыя служыць на карысць людзей. Не даем ім здзейсніць дурную памылку, якая можа каштаваць жыцця. Той выпадак, калі сапраўды нельга вучыцца на сваіх памылках, трэба рабіць высновы з чужых!

У ТЭМУ

У Магілёўскай вобласці арганізавана 61 месца адпачынку ля вады. Органы дзяржсаннагляду абследавалі ўсё: парушэнні патрабаванняў санэпідзаканадаўства выяўлены на 39 аб'ектах. Таксама ў рамках падрыхтоўкі пляжаў да купальнага сезона адабрана 336 проб вады адкрытых вадаёмаў. Усе адпавядаюць гігіенічным нарматывам.

 СБ