Магілёўская «Стужка» выпускае за дзень да 15 тыс. чатырохслаёвых медыцынскіх масак

Магілёўскае прадпрыемства «Стужка» выпускае чатырохслаёвыя медыцынскія маскі з сыравіны ўласнай вытворчасці. У дзень тут шыюць да 15 тыс. вырабаў, як паведаміла начальнік аддзела рэкламы ААТ «Стужка» Таццяна Сафроненка.

«На прадпрыемстве абсталявана некалькі цэхаў, дзе шыюць медыцынскія маскі. Зараз вырабляем 15 тыс. чатырохслаёвых масак на дзень. Нашы спецыялісты распрацоўвалі такі від вырабаў, маскі карыстаюцца вялікім попытам у пакупнікоў. Шчыльныя медыцынскія маскі забяспечваюць абарону ад мікраскапічных часцінак, пылу, бактэрый і вірусаў. Яны засцерагаюць ад траплення ў насаглотку пылка раслін, што адчувальна памяншае алергічныя праявы. Акрамя гэтага, у такой масцы зручней дыхаць, яна не траўмуе скуру твару», – расказала начальнік аддзела.

«Стужка» вырабляе медыцынскі фіксавальны бінт з неабсыпальнымі бакамі, які і з’яўляецца асновай медыцынскіх масак. Для зручнасці яны забяспечаны з двух бакоў эластычнай тасьмой, якую таксама робяць на магілёўскім прадпрыемстве.

Як адзначыла Таццяна Сафроненка, у медыцынскіх масак шмат пераваг перад сінтэтычнымі, самае важнае – яны шматразовыя. Пасля 2–3 гадзін нашэння іх дастаткова памыць, высушыць і прапрасаваць. Машыннае мыццё дапускаецца, але ў асцярожным рэжыме.

Пастаўляюцца маскі ў лячэбныя ўстановы і аптэчную сетку.

ААТ «Стужка» – найбуйнейшы вытворца тэкстыльнай галантарэі і гардзінных вырабаў на постсавецкай прасторы. Прадукцыя выкарыстоўваецца ў швейнай, трыкатажнай, абутковай, электратэхнічнай, мэблевай, хімічнай і іншых галінах прамысловасці. Прымяненне сучасных тэхналогій вытворчасці дазваляе прадпрыемству выпускаць высакаякасную прадукцыю, якая годна канкуруе на рынку краін СНД і далёкага замежжа. У асартыменце больш за 11 тыс. найменняў: стужкі, тасьма, шнуры рознага прызначэння; тэкстыльная галантарэя для работнікаў сілавых структур; сучасныя медыцынскія перавязачныя матэрыялы. Зараз тут працуе 1 128 чалавек.

БЕЛТА