RU BY EN 中文
Twitter Instagram

Магілёўскі абласны драмтэатр рыхтуе фантазію па матывах аповесці Аляксандра Пушкіна «Пікавая дама»

Магілёўскі абласны драматычны тэатр рыхтуе фантазію па матывах аповесці Аляксандра Пушкіна «Пікавая дама». Спектакль упершыню пакажуць гледачу на вялікай сцэне 21 і 22 кастрычніка, як паведамілі ва ўстанове культуры.

Над пастаноўкай працуе таленавітая каманда: рэжысёр Ігар Казакоў, драматург Дзмітрый Багаслаўскі, мастак Таццяна Нерсісян, харэограф Ігар Шугалееў і кампазітар Леанід Паўлянок. Спектакль будуецца на тонкай мяжы пародыі, сутыкненні ілюзій і рэальнасці. «Галоўны герой, той самы пушкінскі Герман, няўдачлівы гулец, аказваецца ў абсурдным шоу, у якім яго жыццё паступова выходзіць з-пад кантролю, а ўсё, што адбываецца, нагадвае трызненне вар’ята. І адбываецца дзеянне, дарэчы кажучы, у Абухоўскі псіхіятрычнай бальніцы», – расказалі ў тэатры.

Тэма барацьбы з фатумам, рокам набывае ў магілёўскай пастаноўцы новае гучанне. «Хай гэта гульня, але з вельмі сур’ёзнымі стаўкамі. Герман імкнецца цалкам авалодаць сваім лёсам –«выцягнуць скарб у чароўнай фартуны». У пагоні за ілюзіяй ён ставіць на кон не толькі капітал, але і сваю свабоду, розум, саму асобу. Сон яго хворага розуму нараджае пачвараў. Прысуд абруселаму немцу выносіць сама руская рэчаіснасць...»,– заключылі ў тэатры.

Аўтары спектакля прапануюць зусім не банальны пераказ вядомай кожнаму школьніку аповесці. Хутчэй, гэта забаўная постмадэрнісцкая гульня з заблытанай, але вельмі цікавай сістэмай правілаў. Тут на парад выходзіць хрэстаматыйная руская класіка ў кампаніі з рускай жа філасофіяй і персанажамі мас-культу на падтанцоўках.

У спектаклі занятыя Алена Крыванос, Аляксандр Куляшоў, Аляксандр Мацюшка, Уладзімір Пятровіч, Данііл Самкнулаў, Аляксей Цыбін, Андрэй Корзан, Максім Чарнюк і іншыя.

Ігар Казакоў –галоўны рэжысёр сучаснага мастацкага тэатра (Мінск), у нядаўнім мінулым – галоўны рэжысёр Магілёўскага абласнога тэатра лялек: прапрацаваў там 13 гадоў, ставіў спектаклі для дзяцей і дарослых. У ліпені гэтага года ён паставіў у СМТ спектакль «Тартюff». Многія работы гэтага рэжысёра названыя мастацкімі адкрыццямі, прызнаныя не толькі беларускай, але і замежнай публікай. Пастаноўкі «Гамлет», «На дне», «Сіняя-сіняя», «Кандыд» сталі сапраўдным прарывам для айчыннага тэатра.

Дзмітрый Багаслаўскі –адзін з самых вядомых беларускіх драматургаў, рэжысёр Цэнтра беларускай драматургіі. Жыве і працуе ў Мінску. З’яўляецца суарганізатарам студыі альтэрнатыўнай драмы (САД) – супольнасці маладых беларускіх драматургаў. П’есы Дзмітрыя Багаслаўскага перакладзены на польскую, італьянскую, іспанскую і ўкраінскую мовы. Пастаноўкі па яго п’есах ідуць у Расіі, Украіне, Польшчы, Румыніі, Грузіі.

 

 

Пры выкарыстанні матэрыялаў актыўная гіперспасылка на mogilev-region.gov.by абавязковая