Магілёўскі гарвыканкам узяў на асаблівы кантроль рамонт дарог у абласным цэнтры

Магілёўскі гарвыканкам узяў на асаблівы кантроль рамонт дарог у абласным цэнтры. Пра гэта расказаў старшыня Магілёўскага гарадскога Савета дэпутатаў Максім Гурын.

«У Магілёве з надыходам спрыяльных умоў надвор'я камунальныя службы прыступілі да актыўных работ па рамонце вулічна-дарожнай сеткі. У горадзе 7 брыгад, якія працуюць днём, а таксама ў начны час. Не спыняюцца рамонтныя працы і ў выхадныя дні. Вядома ж, на працэс рамонту дарог уплывае надвор'е», - адзначыў ён.

Пакуль тэмпература паветра ў абласным цэнтры яшчэ не стабілізавалася, рамонт вядзецца з выкарыстаннем халодных сумесяў з папярэднім іх разаграваннем. «Пытанне рамонту дарог у горадзе стаіць на асаблівым кантролі ў Магілёўскім гарвыканкаме. Хацелася б звярнуцца да гараджан, каб да існуючай сітуацыі яны ставіліся з разуменнем, - адзначыў Максім Гурын. — На сённяшні дзень праінвентарызаваны ўсе вуліцы горада, ёсць графік выканання рамонтных работ па ўстраненню крытычных дэфектаў. Аператыўна неабходна адрамантаваць больш за 4 тыс. кв.м. На сённяшні дзень выканана каля 1,3 тыс. кв.м».

Да працы падлучаюць спецыялізаваную тэхніку, у тым ліку «Тайфун» і фрэзы.

«Асноўная прычына ўтварэння ям на дарогах – перапады тэмпературы. Нельга забываць і аб тым, што нагрузка на дарожнае палатно з цягам часу сур'ёзна павялічваецца, - падкрэсліў старшыня гарадской рады дэпутатаў. - Дарэчы, у гэтым годзе на дарогах горада плануюць правесці ямачны рамонт аб'ёмам 22, 77 тыс. кв.м. Уладкаванне выраўноўваючага пласта асфальтабетоннага пакрыцця вулічна-дарожнай сеткі запланавана правесці больш чым на 83 тыс. кв.м.

У горадзе апроч ямачнага рамонту праводзіцца капітальны рамонт вуліц і праспектаў, актыўныя работы ідуць і на дваровых тэрыторыях. «Зіма, канешне, прынесла нам пэўныя непрыемнасці. Але ўвесь неабходны аб'ём работ па навядзенні парадку ў горадзе будзе забяспечаны, грашовыя сродкі для гэтага запланаваны, - сказаў Максім Гурын. - Важна, каб жыхары і госці горада ставіліся да таго, што адбываецца, з цярпеннем і разуменнем».

Так, у горадзе пачаўся капітальны рамонт вул. Камсамольскай - на гэтым участку перакрыты рух аўтамабіляў і грамадскага транспарту. Папярэдні кошт работ складае каля Br2 млн. «Цяпер актыўна вядзецца будаўніцтва другой чаргі пуцеправода-дублера вул. Якубоўскага - Загарадная шаша, у маі плануюць прыступіць да завяршальнага этапу дадзенага праекта. Таксама ў бягучым годзе плануецца завяршыць рамонт вул. Будаўнікоў, скончыць трэцюю чаргу вул. Крупскай. Апроч гэтага, рамонтныя работы будуць праводзіцца на ўчастку вул. Каралева да пр. Міра, чакаецца рэканструкцыя пр. Дзімітрава і Пушкінскага», - падзяліўся планамі Максім Гурын.

БЕЛТА