Магілёўскіх школьнікаў урачыста прынялі ў мытны клас

Абяцанне старанна вучыцца, выхоўваць у сабе мужнасць, высакароднасць і годнасць, імкнуцца стаць дастойнымі грамадзянамі Беларусі далі навучэнцы магілёўскай сярэдняй школы № 21. Клятву рабяты прынеслі падчас цырымоніі пасвячэння ў спецыялісты мытнага класа.

Са знамянальнай падзеяй маладое пакаленне павіншавалі начальнік Магілёўскай мытні Дзмітрый Гурыновіч, намеснік дырэктара па вучэбнай рабоце СШ нумар 21 Таццяна Райкіна, ветэран мытнай службы Ігар Дарашкоў і работнікі службы.

Віншуючы юнакоў і дзяўчат, Дзмітрый Гурыновіч адзначыў, што ў Міжнародны дзень мытніка ў спецыялізаваны клас урачыста прынята 29 навучэнцаў. Іх далейшае навучанне будзе садзейнічаць інтэлектуальнаму, фізічнаму, маральнаму і патрыятычнаму выхаванню моладзі. Можа, не ўсе з іх стануць мытнікамі, але набытыя веды дапамогуць ім знайсці свой правільны шлях.

Таццяна Райкіна падкрэсліла важнасць уступлення ў клас у Год якасці. Намеснік дырэктара па вучэбнай рабоце СШ №21 давала наказ школьнікам быць годнымі грамадзянамі сваёй краіны і з гонарам насіць форму.

Аб рашэнні пайсці ў мытны клас распавёў Іван Шведаў:

- У будучыні я планую звязаць сваё жыццё і кар'еру з мытнымі органамі, і думаю, што навучанне ў спецыялізаваным класе пойдзе толькі на карысць. Тут я пастараюся развівацца ў профільных прадметах, вывучаць дадатковыя дысцыпліны, якія могуць спатрэбіцца ў будучыні. А таксама хочацца паўдзельнічаць у мерапрыемствах, якія ладзіць для нас мытня.

Са словамі на дарогу звярнуўся да рабят ветэран мытнай службы Ігар Дарашкоў, які адзначыў, што часы змяняюцца, але, выбіраючы прафесію, трэба думаць аб сваіх перавагах, здольнасцях і талентах, каб справа была цікавай, пажадаў рабятам не баяцца цяжкасцяў, а вучыцца пераадольваць іх.

Прыемным падарункам і для юнакоў і спецыялістаў службы стала канцэртная праграма, падрыхтаваная сумеснымі намаганнямі. Напрыканцы свята дзеці атрымалі салодкія падарункі і сувеніры.

Рэд., фота Магілёўскай мытні