Магілёўскія беспрацоўныя могуць бясплатна навучыцца бізнес-планаванню

У мінулым годзе 110 беспрацоўных магілёўцаў атрымалі дзяржаўную субсідыю на адкрыццё ўласнай справы: большасць – на прадпрымальніцкую дзейнасць, каля чвэрці сталі рамеснікамі. Сёлета такія субсідыі ў Магілёве атрымала ўжо 14 чалавек, паведаміла начальнік аддзела забеспячэння занятасці насельніцтва упраўлення па працы, занятасці і сацыяльнай абароне Магілёўскага гарвыканкама Сняжана Маісеева.

Каб падтрымаць беспрацоўных з прадпрымальніцкай жылкай, служба занятасці арганізавала спецыяльныя двухтыднёвыя курсы па бізнес-планаванні. Іх слухачы заканчваюць навучанне ўжо з гатовым бізнес-планам на руках. Зараз на адкрыццё сваёй справы беспрацоўны грамадзянін, які паспяхова абараніў бізнес-план, можа атрымаць 11 бюджэтаў пражытачнага мінімуму – больш за 1000$ у эквіваленце.
«Субсідыя выдаецца на набыццё абсталявання, расходных матэрыялаў, а таксама можна закупіць першую партыю тавару. Для пачатку бізнесу гэта добрая дапамога. Бывае, што прадпрымальнікі-пачаткоўцы бяруць у арэнду памяшканне, дзе няма самых неабходных рэчаў: стала, крэсла. На дзяржаўную субсідыю якраз можна іх набыць», – патлумачыла Сняжана Маісеева.

Радыё «Магілёў»