Майстры Бабруйскага і Круглянскага раёнаў прадставілі сваё майстэрства на Днях Магілёўскай вобласці ў Маскве

У Маскве працягваюцца Дні Магілёўскай вобласці. Расійская сталіца будзе прымаць гасцей з Прыдняпроўскага краю па 22 красавіка ва ВДНГ. Выставачная экспазіцыя нашага рэгіёну «Магілёўшчына – гераічнае мінулае і слаўная будучыня» заклікана пазнаёміць жыхароў і гасцей Масквы з багатай гістарычнай, культурнай і турыстычнай спадчынай Магілёўшчыны, а таксама прадэманстраваць прамысловы і інвестыцыйны патэнцыял вобласці.

У экспазіцыі значнае месца адведзена яе культурным брэндам. Так, з 4 па 8 красавіка майстры Бабруйскага і Круглянскага раёнаў прадэманстравалі майстар-класы па ткацтве, вырабе тэкстыльнай лялькі, традыцыйнага посуду на ганчарным крузе і пляценні паясоў. Ад Бабруйскага раёна сваё майстэрства і таленты ў сталіцы Расіі дэманстравалі народны майстар Беларусі Аляксандр Арлоў, загадчык Цэнтра рамёстваў пасёлка Глуша Лаура Фамцова.

 З канцэртнай праграмай выступіў народны ансамбль народнай песні «Пярэзвы» (кіраўнік - Валянціна Грыгор'ева) раённага Цэнтра культуры ДУК «Цэнтралізаваная клубная сістэма Бабруйскага раёна».

Круглянскі раён прадстаўлялі загадчык раённага Дома рамёстваў Сняжана Гарбачова і метадыст-майстар, народны майстар Рэспублікі Беларусь Ларыса Лямцава.

– На выставе мы дэманстравалі майстар-класы па ткацтве беларускіх традыцыйных паясоў і дарожак, – расказвае Сняжана Уладзіміраўна. - Прыемна было бачыць, як расіяне цікавяцца нашай культурай. Было шмат дзяцей і моладзі. Яны задавалі шмат пытанняў. Масквічоў цікавіла колькі гадоў ткацкаму станку, хто нас навучыў ткаць, чаму тыя ці іншыя колеры скарыстаны ў арнаменце. Усе дзякавалі нам за працу. І, вядома ж, з задавальненнем спрабавалі ткаць на беларускім станку.

 - Я паясы тку ўжо больш за 20 гадоў, - кажа Ларыса Лямцава. - Прыемна была здзіўленая зацікаўленасцю расіян да народнай творчасці. Калі бачыш іх рэакцыю, то перапаўняе пачуццё гонару за нашу краіну і майстроў.

Усе наведвальнікі выставы выказвалі шчырую падзяку майстрам Магілёўшчыны за захаванне народных традыцый. Але самае кранальнае - гэта тое, што яны з радасцю апускаліся ў свет беларускага мастацтва і з задавальненнем спрабавалі ткаць дарожку і паясы.

Раней сваё майстэрства на Днях Магілёўскай вобласці ва ВДНГ дэманстравалі ўмельцы Дрыбінскага і Мсціслаўскага раёнаў.

 mogilevnews.by