Мемарыял «Слаўны» ў Клічаўскім раёне адкрыюць пасля рэканструкцыі 22 чэрвеня

Урачыстае адкрыццё пасля рэканструкцыі мемарыяла ў памяць аб спецатрадзе «Слаўны» на востраве Верамееўка ў Клічаўскім раёне запланавана на 22 чэрвеня. Пра гэта паведамілі ў Магілёўскім аблвыканкаме.

Добраўпарадкаваная тэрыторыя, новая агароджа, помнік і надмагіллі – мемарыял «Слаўны» змяніў сваё аблічча пасля рамонтных работ. Як расказалі ў Клічаўскім райвыканкаме, памятнае месца цалкам гатовае да наведванняў. Для зручнасці людзей мясцовыя камунальныя службы зараз пабудуюць спецыяльны драўляны насціл па топкай мясцовасці. Дзякуючы гэтаму будзе прасцей дабірацца да ўнікальнага мемарыяла, размешчанага на балоце.

Пахаванне байцоў спецатрада «Слаўны» знайшлі праз 50 гадоў пасля заканчэння Вялікай Айчыннай вайны. На востраве Верамееўка пасярод балота размяшчаюцца 18 адзіночных і 1 брацкая магіла. У 2019 годзе гэтаму памятнаму месцу быў прысвоены статус гісторыка-мемарыяльнага месца пахавання. Напрыканцы 2021 года тут закіпела маштабная праца: пачалі рэканструкцыю мемарыяла. З-за складанага месцазнаходжання, куды не могуць дабрацца машыны, будаўнічыя матэрыялы дастаўлялі да месца работ пры дапамозе верталёта і спецыялістаў з Міністэрства па надзвычайных сітуацыях.

БЕЛТА