Рус Бел Eng 中文

Мерапрыемствы да Дня моладзі пройдуць ва ўсіх гарадах і раёнах Магілёўскай вобласці

 

Па традыцыі ў апошнюю нядзелю чэрвеня ў Беларусі адзначаецца Дзень моладзі. Ва ўсіх гарадах і раённых цэнтрах Магілёўскай вобласці пройдуць мерапрыемствы з удзелам кіраўніцтва раёнаў і навучальных устаноў, лідараў моладзевых грамадскіх арганізацый, паведамілі ў аблвыканкаме.

У арганізацыях і ўстановах рэгіёна запланаваны вечары адпачынку, конкурсна-гульнявыя, танцавальна-забаўныя праграмы, кніжныя выставы, тэматычныя гутаркі, майстар-класы.

У рэгіёнах пройдуць раённыя этапы рэспубліканскага конкурсу «Уладар сяла».

У горадзе на Бярэзіне адбудзецца фотавелаквест «Насустрач 633-годдзю Бабруйска», конкурсная праграма «Наперад, моладзь!», анлайн-гульня «Бабруйск малады».

У Клімавічах свята адзначаць урачыстым узнагароджаннем лепшых прадстаўнікоў моладзі раёна, конкурсна-забаўляльнай праграмай «Зажигай!» і дыскатэкай «Моладзь – раЗАм!».

У Слаўгарадзе арганізуюць мерапрыемства «Мы – надзея краіны!».

Глуск парадуе хлопцаў канцэртнай праграмай «Маладыя таленты Глусчыны», добраўпарадкаваннем пляцовак у рамках праекта #«РаЗАм з бацькамі» і квэст-гульнёй «Гэта мой дзень – Дзень моладзі».

У Дрыбіне адбудзецца канцэрт «Планета пад назвай “Маладосць”», конкурсна-гульнявая праграма для маладых сямейных пар «Бэбі бум» і велапрабег «Моладзь аб’ядноўвае...».

Экалагічным дэсантам «Хай будзе чыста» будзе праведзена ўборка членамі ГА БРСМ прыбярэжнай тэрыторыі Сідараўскага вадасховішча ў Краснаполле. Таксама тут пройдзе флэш-моб «Даеш, моладзь!».

Святочная канцэртная праграма «Планета маладосці» і папулярны танцавальны сімулятар «Плэй-дэнс» запланаваны да правядзення ў Хоцімску.

У Касцюковічах пройдзе канцэртная праграма «Тэрыторыя моладзі», а ў Чавусах – раённы конкурс «Аўталэдзі» і фестываль «Краскі холі».

У Магілёве напярэдадні свята 27 чэрвеня правядуць урачыстую адпраўку студэнцкіх атрадаў для працы на аб’ектах рэспубліканскага значэння ў летні перыяд 2020 года.

У нядзелю 28 чэрвеня моладзь абласнога цэнтра зможа прыняць удзел у эстафеце «Бітва двароў» сярод маладых сем’яў, вялікім пікніку, моладзевай творчай праграме «Моладзевы МІХ» з узнагароджаннем і гала-канцэртам пераможцаў конкурсу «Артфест», «#Победа75». Па знакавых мясцінах горада пройдзе велаквест з элементамі арыентавання «У рытме горада».

 

Пры выкарыстанні матэрыялаў актыўная гіперспасылка на mogilev-region.gov.by абавязковая