Метады і перспектывы ідэалагічнай працы і камунікацыйнай палітыкі ў сучасных умовах абмеркавалі ў Магілёве

Формы, метады і перспектывы сістэмы ідэалагічнай работы ў сучасных умовах, актуальныя праблемы геапалітыкі, камунікацыйнай палітыкі дзяржорганаў і арганізацый абмеркавалі ў першы дзень семінара для асоб, якія знаходзяцца ў рэзерве кадраў на кіруючыя пасады і слухачоў Народнага універсітэта грамадзянскай, прафесійнай адукацыі і інфармавання спецыялістаў сацыяльна-эканамічнага комплексу вобласці рэгіянальнай арганізацыйнай структуры таварыства «Веды». Тэарэтычныя і практычныя заняткі, уключаныя ў вучэбную праграму, праходзяць у МДУ імя А.А.Куляшова 6-7 красавіка і накіраваны на пашырэнне прафесійных ведаў, павышэнне прафесійнай кампетэнтнасці. Удзел у адкрыцці семінара 6 красавіка прынялі памочнік Прэзідэнта - інспектар па Магілёўскай вобласці Леанід Мартынюк, аналітык Беларускага інстытута стратэгічных даследаванняў Аляксей Аўдонін, першы прарэктар МДУ імя А.А. Куляшова Дзмітрый Лаўрыновіч, начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка, першы намеснік старшыні праўлення абласной аргструктуры РДГА «Веды» Раіса Шугалеева, старшыня гарадскога Савета дэпутатаў Максім Гурын.

Вітаючы ўдзельнікаў вучобы, Леанід Мартынюк адзначыў, што ў краіне і ў Магілёўскай вобласці, у прыватнасці, выбудавана эфектыўная сістэма работы ідэалагічнай вертыкалі. І падобныя семінары дазваляюць падтрымліваць належны ўзровень кампетэнтнасці кожнага рэзервіста. Гэта магчымасць асвоіць актуальныя інструменты, якія выкарыстоўваюцца ў стагоддзе IT-тэхналогій і дазваляюць ідэалагічным работнікам быць праваднікамі для людзей у сацыяльна-палітычнай абстаноўцы, дапамагаць ім зарыентавацца ў тых працэсах, што адбываюцца ўнутры краіны і за яе межамі. А для гэтага неабходна валодаць адпаведнымі ведамі, увесь час папаўняць і абнаўляць іх.

«Безумоўна, кожны з вас на сабе адчувае тую ўвагу, якая сёння надаецца працы з кадрамі, – адзначыў Леанід Мартынюк. - Гэта і практыка-арыентаваныя семінары, і інфармацыйныя сустрэчы. У прыватнасці, на буйных прадпрыемствах вельмі важна, напрыклад, разумець спецыфіку, функцыянал работы, каб граматна выбудаваць узаемадзеянне з людзьмі, якіх часам занята на вытворчасці каля тысячы і вышэй. Гэта вялізны калектыў і трэба ўмець пачуць кожнага. Нездарма гэтаму напрамку надаецца такая ўвага. Арганізоўваюцца семінары, запрашаюцца вопытныя эксперты, спікеры. Яны дазваляюць удзельнікам, акрамя ўсяго іншага, пагутарыць, абмяняцца досведам. І атрымаць тыя веды, якія яны потым будуць прымяняць на практыцы, што, у канчатковым выніку, унясе станоўчыя аспекты ў іх працоўную дзейнасць».

У форме дыялогу выбудаваў свае зносіны з аўдыторыяй на тэму сучасных метадаў камунікацыі і кіравання ва ўмовах нявызначанасці Аляксей Аўдонін.

«Тая мадэль, якую калектыўны Захад вызначыў для нас на бліжэйшыя 15 гадоў – гнятлівая. Таму ідзе размова аб ролі ідэолагаў, работнікаў гэтага сектара, для забеспячэння стабільнасці нашай дзяржавы, захавання суверэнітэту, незалежнасці, - падзяліўся ён. - Аб гэтым гаварыў у сваім Пасланні Прэзідэнт Беларусі. Супраць суверэнітэту і незалежнасці дзяржаў, суб'ектаў міжнародных адносін у цяперашні час накіраваны ўсе намаганні буйных сусветных карпарацый. І гэта не кабінетныя высновы, а напрацоўкі заходніх экспертаў, фабрык думак.

Таму, разглядаючы праблемныя пытанні ідэалагічнай працы ў сучасных умовах мы, у першую чаргу, павінны разумець, якім тэхналогіям мы супрацьстаім. Сёння яны арыентаваны на кіраванне масамі. Мы жывем у век развіцця камунікацыйных тэхналогій. Што дазволіла скараціць час перадачы інфармацыі да імгнення. Таму ідэолаг сёння павінен умець выкарыстоўваць розныя каналы інфармацыі і арыентавацца ў формах яе перадачы, якія хутка змяняюцца».

Таксама ў гэты дзень перад аўдыторыяй выступілі спікеры, якія расказалі пра сучасныя тэхналогіі ў кіраванні, патрабаванні да кіраўнікоў органаў дзяржкіравання і асновы фарміравання кадравага рэзерву, ролю рэгіянальных сродкаў масавай інфармацыі ў фарміраванні грамадскай думкі.

У другі дзень работы для ўдзельнікаў семінара запланаваны лекцыйна-практычныя заняткі ў групах і наведванне кампаніі «Дамачай» для азнаямлення з вопытам рэалізацыі ідэалагічнай работы на прадпрыемстве.

Юлія Таранава, фота Галіны Гаўрыловіч