Міхаіл Русы правёў прыём грамадзян па асабістых пытаннях у Слаўгарадскім раёне

Становішча спраў у сельскай гаспадарцы, перабоі гарачага водазабеспячэння, рашэнне экалагічных праблем. Гэта толькі невялікі пералік пытанняў, якія падымалі людзі ў размове з памочнікам Прэзідэнта – інспектарам па Магілёўскай вобласці Міхаілам Русым. Прычым, што характэрна, на прыём прыйшлі не толькі жыхары Слаўгарадскага раёна. Са сваімі праблемамі звярталіся жыхары Быхава, Крычава, Магілёва, Магілёўскага раёна.

Раіса Шынкевіч – бухгалтар ААТ «Жалезінскі-Агра», што ў Слаўгарадскім раёне – прыйшла пагаварыць пра тое, што ёй заніжаецца заработная плата. Адначасова расказала аб праблемах гаспадаркі. Апошнія пачутыі будуць вывучацца. Размова скончылася нечакана. Раіса Міхайлаўна як дасведчаны і неабыякавы спецыяліст атрымала прапанову ўзначаліць якую-небудзь гаспадарку. Але адказу пакуль не дала – думае.

Кіраўнік Магілёўскага ТАА «Данатон» Яўген Каташэнка спецыялізуецца на перапрацоўцы старых шын. Вытворчасць энергазатратная. Таму, каб аптымізаваць выдаткі, Каташэнка захацеў выкарыстоўваць энергію ветру. Думаў на тэрыторыі прадпрыемства паставіць вятрак. Нават купіў яго. Але ажыццявіць задумку два гады не можа: не даюць «дабро» ад Міністэрства энергетыкі. Міхаіл Русы паабяцаў дапамагчы разабрацца з праблемай.

У жыхароў дзвюх пяціпавярховак па вуліцы Кастрычніцкай у Слаўгарадзе з мая гэтага года пагоршыліся ўмовы пражывання: у дамы перастала паступаць гарачая вада. Звязана гэта з тым, што водаправод гарачага водазабеспячэння зношаны больш чым на 80%, рамантаваць яго сэнсу няма. Замену ж планавалася вырабіць у 2020-м (у гэтым не атрымліваецца з-за недахопу сродкаў). Міхаіл Русы адзначыў, што на тое, каб аператыўна вырашыць праблему жыхароў пяціпавярховак, грошы будуць знойдзены: такое рашэнне прыняў старшыня Магілёўскага аблвыканкама Леанід Заяц. У людзей у найбліжэйшы час павінна палепшыцца якасць жыцця.

10 чалавек запісалася на прыём да Міхаіла Русага. Кожны атрымаў адказ па сваёй праблеме. Каментуючы вынікі прыёму па асабістых пытаннях, Міхаіл Іванавіч адзначыў, што частку з узнятых пытанняў можна было зняць на месцы. І яшчэ. Калі рыхтуюцца адказы на звароты, трэба пазбягаць шаблонаў. Размова з людзьмі павінна весціся гранічна канкрэтна, па сутнасці.