Рус Бел Eng 中文

Міліцыя Магілёўскай вобласці забяспечвае кантроль падчас уборачнай кампаніі

У Беларусі пачалі ўборку новага ўраджаю. Адна з прыярытэтных задач праваахоўнікаў – прафілактыка і спыненне злачынстваў і правапарушэнняў, забеспячэнне бяспекі дарожнага руху ў сферы аграпрамысловага комплексу, паведамілі ў групе інфармацыі і грамадскіх сувязей УУС Магілёўскага аблвыканкама.

З гэтай мэтай ва УУС створана рабочая група, у склад якой увайшлі супрацоўнікі ўпраўлення па барацьбе з эканамічнымі злачынствамі, аховы правапарадку і прафілактыкі, ДАІ. Аналагічныя групы працуюць ва ўсіх тэрытарыяльных органах унутраных спраў рэгіёна. Штодня супрацоўнікі выязджаюць у раёны для маніторынгу ўборачнай кампаніі.

«Акрамя іншых, перад намі стаіць задача правядзення агляду ўсёй аўтамабільнай і сельскагаспадарчай тэхнікі для вызначэння яе наяўнасці і працаздольнасці, высвятлення прычын яе разукамплектавання і знаходжання ў непрацоўным стане працяглы час, – распавёў намеснік начальніка УБЭЗ УУС падпалкоўнік міліцыі Аляксандр Слонімскі. – Мы нацэлены на выяўленне і спыненне фактаў безгаспадарчасці з боку кіраўнікоў і матэрыяльна адказных асоб арганізацый, вывучэнне абгрунтаванасці расходавання гаруча-змазачных матэрыялаў, недахопаў па забеспячэнні захаванасці новага ўраджаю».

У сваю чаргу, начныя мабільныя групы органаў унутраных спраў вывучаюць якасць выканання службовых абавязкаў вартаўнікамі сельскагаспадарчых арганізацый на сваіх працоўных месцах.

Супрацоўнікі ДАІ забяспечваюць бяспеку дарожнага руху. Не заўсёды ўдзельнікі ўборачнай кампаніі выконваюць законы дарог, што можа прывесці да ДТЗ. Нярэдка тэхніка сельскагаспадарчых арганізацый эксплуатуецца без праходжання дзяржаўнага тэхагляду. «Кіраўнікам прадпрыемстваў АПК вядома, што за выпуск транспартнага сродку, які мае няспраўнасці, пры наяўнасці якіх яго эксплуатацыя забаронена, або які не прайшоў дзяржаўны тэхнічны агляд і працэдуру выдачы дазволу на яго допуск да ўдзелу ў дарожным руху, прадугледжана адміністрацыйная адказнасць у выглядзе штрафу ў памеры ад 4 да 6 базавых велічынь», – удакладнілі спецыялісты.

Акрамя таго, надаецца пільная ўвага праходжання кіроўцамі і механізатарамі штодзённага перадрэйсавага кантролю. Парушэнні ў дадзеным выпадку цягнуць адміністрацыйную адказнасць у дачыненні да службовых асоб.

«Практыка паказвае, што, дзякуючы штодзённаму маніторынгу, акрамя пералічаных вышэй, значна памяншаецца колькасць парушэнняў працоўнай дысцыпліны, у тым ліку знаходжанне на працоўным месцы ў стане алкагольнага ап'янення, фактаў дробнага крадзяжу, незаконнага звароту паліва, парушэнняў правілаў транспарціроўкі збожжа, – адзначылі ў групе інфармацыі і грамадскіх сувязей УУС. – Гэтаму спрыяюць і прафілактычныя меры, што прымаюцца супрацоўнікамі міліцыі: у раёнах праходзяць рабочыя сустрэчы з кіраўнікамі прадпрыемстваў АПК, гутаркі з тымі, хто нясе адказнасць за захоўванне маёмасці, сабраны ўраджай і нарыхтаваныя кармы»

 

Пры выкарыстанні матэрыялаў актыўная гіперспасылка на mogilev-region.gov.by абавязковая