Міжнародная патрыятычная акцыя, прысвечаная памяці Канстанціна Сіманава, праходзіць у Магілёве

Міжнародная патрыятычная акцыя «Гэта трэба не мёртвым. Гэта трэба – жывым», прысвечаная памяці Канстанціна Сіманава, праходзіць у Магілёве. Пачалася яна на мемарыяльным комплексе «Буйніцкае поле». Удзельнікі мерапрыемства ўсклалі кветкі ў памяць пра паэта і пісьменьніка, прачыталі яго вершы.

– Сімвалічна, што наша сустрэча адбылася менавіта ў гэтым легендарным месцы. Тут праходзілі гераічныя бітвы падчас Вялікай Айчыннай вайны і развеяны прах франтавога журналіста, паэта і драматурга, – падзяліўся член праўлення Саюза пісьменнікаў Саюзнай дзяржавы, старшыня Магілёўскага абласнога аддзялення Саюза пісьменнікаў Беларусі Аляксандр Казека. – Мы лічым, што працу па захаванні памяці Канстанціна Сіманава ў нашым рэгіёне трэба пашыраць. Важна шукаць новыя формы і падыходы, якія працавалі б на моладзь і пры гэтым працягвалі б даўнія традыцыі. На гэтых сустрэчах можна пабудаваць патрыятычнае мерапрыемства міжнароднага значэння, якое аб’ядноўвае літаратараў дзвюх краін і спрыяе збліжэнню культур двух народаў.

Дарэчы, міжнародная патрыятычная акцыя зацверджана на пленуме Саюза пісьменнікаў Саюзнай дзяржавы ў кастрычніку 2019 года, які праходзіў у Магілёве. Яна аб’яднала людзей розных узростаў і прафесій.

На мемарыяльным комплексе «Буйніцкае поле» сабраліся прадстаўнікі гарвыканкама, кансультант прадстаўніцтва Рассупрацоўніцтва ў Рэспубліцы Беларусь Расійскага цэнтра навукі і культуры ў Мінску Аляксандр Пугачоў, члены Магілёўскага абласнога аддзялення Саюза пісьменнікаў Беларусі, прадстаўнікі ветэранскай арганізацыі «Гонар» і аддзела ідэалагічнай і кадравай работы УКДБ па Магілёўскай вобласці, грамадскіх ветэранскіх арганізацый і арганізацый расійскіх суайчыннікаў горада Магілёва, навучэнцы школ і іншыя жыхары абласнога цэнтра.

– У чым каштоўнасць Сіманаўскіх чытанняў для Расіі і Беларусі? Перш за ўсё ў тым, што гэта наша культура і гісторыя, якую важна шанаваць, паважаць і перадаваць маладому пакаленню, не даваць нікому магчымасці фальсіфікаваць падзеі, якія адбыліся, – падкрэсліў Аляксандр Пугачоў.

mogilevnews.by