Моладзь Магілёўскай вобласці далучыцца да рэспубліканскага анлайн-дыялогу «Адзінства! Развіццё! Незалежнасць!»

Беларускі рэспубліканскі саюз моладзі сёння правядзе адкрыты анлайн-дыялог «Адзінства. Развіццё. Незалежнасць», як паведамілі ў абласным камітэце ГА «БРСМ».

Дыскусійная пляцоўка аб’яднае 140 прадстаўнікоў каманды саюза моладзі – удзельнікаў VI Усебеларускага народнага сходу. Галоўная задача маладзёжнай сустрэчы – зверыць гадзіннікі напярэдадні важнай грамадска-палітычнай падзеі. Сувязь са студыямі ў абласных цэнтрах і Мінску будзе наладжана праз карпаратыўную платформу Zoom. Удзельнікі УНС з аддаленых раёнаў змогуць падключыцца да анлайн-дыялогу самастойна.

Цэнтральная студыя размесціцца ў Рэспубліканскім доме моладзі ў Мінску. Маладыя людзі Магілёўскай вобласці будуць працаваць у зале селектарных нарад Дома Саветаў (г. Магілёў, вул. Першамайская, 71).

Адкрые дыялог сумеснае выкананне ў студыях гімна Беларусі. Акрамя таго, будзе дадзены старт рэспубліканскаму праекту БРСМ «Роднае – народнае», накіраванаму на папулярызацыю дзяржаўных сімвалаў у Год народнага адзінства, а таксама адбудзецца абмеркаванне праекта праграмы сацыяльна-эканамічнага развіцця Беларусі на 2021–2025 гады па напрамках моладзевай палітыкі. Мадэратарам дыскусіі выступіць Першы сакратар Цэнтральнага камітэта БРСМ, член Савета Рэспублікі Дзмітрый Варанюк.