Моладзевы патрыятычны праект «Дарогамі Памяці і Славы» прадставілі падчас Дзён Магілёўскай вобласці на ВДНГ

Маштабны праект, які аб'ядноўвае тысячы маладых людзей Расіі і Беларусі, стартаваў у 2022 годзе. Ён з'явіўся з ініцыятывы Магілёўскага абласнога камітэта БРСМ пры падтрымцы абласнога выканаўчага камітэта. Сёлета стартаваў ужо трэці яго сезон.

Як адзначыў у выступленні падчас прэзентацыі Магілёўскай вобласці на ВДНГ старшыня аблвыканкама Анатоль Ісачанка, у адносінах Беларусі і Расіі за эканомікай не трэба забываць і сацыяльную сферу. Маладзёжная палітыка ў гэтай галіне адыгрывае значную ролю, сказаў ён.

- У гэтым годзе ўжо трэці раз мы будзем праводзіць міжнародны моладзевы патрыятычны праект «Дарогамі Памяці і Славы». Гэта адна з найбольш значных і маштабных моладзевых ініцыятываў Магілёўскай вобласці. Праект пачаў свой шлях у 2022 годзе. Яго галоўная мэта заключаецца ў згуртаванні падрастаючага пакалення на аснове гістарычных гераічных традыцый нашай Радзімы, супрацьстаянні спробам скажэння праўды аб ролі савецкага народа ў Вялікай Айчыннай вайне, папулярызацыі дасягненняў сучаснай беларускай дзяржаўнасці. Праект выклікаў вялікую цікавасць, і было прынята рашэнне правесці яго на больш маштабным узроўні, з запрашэннем моладзі з расійскіх рэгіёнаў, - заявіў губернатар Магілёўскай вобласці.

Ён паведаміў, што ў чэрвені 2023 года ўдзельнікамі праекта сталі Смаленская, Бранская, Ленінградская, Астраханская вобласці і Хабараўскі край. А ў бягучым годзе да яго далучыцца яшчэ 11 рэгіёнаў Расійскай Федэрацыі.

 СБ