«M.@rt.кантакт–2020». У праграме заяўлена 24 спектаклі 24 тэатраў з 11 краін свету. Продаж білетаў стартуе 8 студзеня

У Магілёўскім абласным драматычным тэатры адбылася першая прэс-канферэнцыя, прысвечаная ХV Міжнароднаму моладзеваму тэатральнаму форуму «M.@rt.кантакт–2020». Аб падрыхтоўцы да фестывалю і афішы мерапрыемства расказалі намеснік старшыні Магілёўскага аблвыканкама Валерый Малашка, начальнік упраўлення культуры аблвыканкама Алег Стэльмашок і дырэктар Магілёўскага абласнога драматычнага тэатра Андрэй Новікаў.

Афіша «M.@rt.кантакту–2020»

У гэтым годзе «М.@rt.кантакт» будзе адзначаць 15-годдзе. У сувязі з юбілейнай датай асноўная праграма фестывалю, а таксама спецыяльная і цырыманіяльная часткі абяцаюць быць асабліва яркімі і насычанымі.

Плануецца паказ 24 спектакляў 24 тэатраў і незалежных тэатральных праектаў з 11 краін свету: Арменіі, Беларусі, Вялікабрытаніі, Грузіі, Ізраіля, Казахстана, Літвы, Польшчы, Расіі, Украіны, Сербіі. Дарэчы, апошняя з’яўляецца дэбютанткай. Тэатр «SCENA MASKA» з Бялграда прадставіць монаспектакль на роднай мове з субтытрамі пра вядомага сербскага акцёра Зарана Радміловіча.

На форум запрошаны калектывы, якія ўжо ярка праявілі сябе ў папярэднія гады, а таксама новыя творчыя групы. Магілёўцам і гасцям горада трэба будзе пазнаёміцца з «Тэатр post» (Санкт-Пецярбург), Незалежнай тэатральнай кампаніяй HomoCosmos (Мінск), ZBSband (Кіеў, Украіна), Тэатрам «SCENA MASKA» (Бялград, Сербія), Ерэванскім дзяржаўным тэатрам «Амазгаін» імя Соса Саркісяна (Арменія), Хіп-Хап тэатрам «Арганізмы» (Санкт-Пецярбург), Тэатрам лялек Карэліі (Петразаводск), Гарадскім драматычным тэатрам «Пошук» (Лесасібірск, Расія). Сярод новых удзельнікаў таксама вучэбны тэатр «На Махавой». Трупу складаюць студэнты Расійскага дзяржаўнага інстытута сцэнічных мастацтваў, вучні розных курсаў. На форуме спектакль «Наш клас» прадставяць студэнты 4 курса майстэрні В. М. Фільшцінскага.

Спектаклі фэста, як заўсёды, будуць пра моладзь, для моладзі і з удзелам моладзі. Тэмы – актуальныя і вечныя: узаемаадносіны паміж людзьмі і канфлікт пакаленняў, станаўленне асобы і пошук сябе, масавая культура і інтэрнэт, свабода і палітыка, любоў і адзінота і інш.

У дзень адкрыцця форуму на асноўнай сцэне свой спектакль «Шынель» прадставіць Тбіліскі Дзяржаўны акадэмічны Рускі драматычны тэатр імя А. С. Грыбаедава (Грузія). Гэта найстарэйшы рускі тэатр за межамі Расіі, першы прафесійны тэатральны калектыў на Каўказе, які ў 2020 годзе адзначыць 175-годдзе.

«Нас заўсёды хвалюе чаканне: які водгук знойдзе праграма фестывалю ў гледачоў, бо мастацтва – рэч суб’ектыўная, – адзначыў Андрэй Новікаў. – 15-гадовая праца па фарміраванні мастацкага густу ў жыхароў Магілёва мне здаецца дарма не прайшла. Цяперашні фестываль будзе лакмусавай паперкай на праверку таго, як мы рухаліся гэтыя гады. Таму што праграма форуму атрымалася вельмі цікавая, але досыць складаная для ўспрымання. Шмат класікі, прычым магутнай. Гледачоў чакае добрая ін’екцыя рускай літаратуры найвышэйшага ўзроўню. Аднак гэта зусім сучасныя спектаклі і іх прачытанне. Думаю, больш традыцыйнай будзе толькі адна пастаноўка – «Зімовая казка» паводле Шэкспіра».

Спецыяльная праграма

Прадугледжана цікавая спецыяльная праграма. Пройдуць круглыя сталы, творчыя сустрэчы, дыскусіі, выставы, майстар-класы вядомага драматурга, рэжысёра, педагога Мікалая Каляды і прафесара Расійскага інстытута сцэнічнага мастацтва, легендарнага тэатральнага педагога, рэжысёра Веніяміна Фільшцінскага. Плануюцца сумесныя мерапрыемствы з Цэнтрам беларускай драматургіі (Мінск) у прыватнасці з моладзевай драматургічнай лабараторыяй. Яе мэтай будзе стварэнне тэксту для спектакля-праменаду – імерсіўнай пастаноўкі, якая стварае эфект поўнага пагружэння гледача і выступленне яго паўнапраўным удзельнікам таго, што адбываецца, удзельнікам сюжэту.

Арганізуюць і традыцыйную для форума майстэрню маладой рэжысуры. Разам з акцёрамі Магілёўскага драматычнага тэатра запрошаны малады рэжысёр Мікалай Балабан на працягу фестывалю створыць эскіз спектакля, які будзе прадстаўлены на суд публікі і экспертаў у дзень закрыцця, 27 сакавіка.

Для абмеркавання спектакляў плануецца запрасіць крытыкаў розных пакаленняў, а таксама, па сталай традыцыі, даць ініцыятыву студэнцкай моладзі, якая будзе адглядаць праграму, працаваць з гледачамі, мець зносіны з удзельнікамі і гасцямі форума, збіраць меркаванні, рыхтаваць публікацыі, актыўна працаваць у сацыяльных сетках.

Традыцыйныя штодзённыя абмеркаванні прагледжаных спектакляў пройдуць у фармаце творчых сустрэч, што дасць магчымасць жывых зносін паміж удзельнікамі, гасцямі фестывалю, маладымі крытыкамі, гледачамі і прадстаўнікамі СМІ. Таксама будзе выпушчана друкаванае выданне пра форум, азнаёміцца з якім можна на сайце тэатра і ў сацыяльных сетках.

Пляцоўкі

Спектаклі форума будуць прадстаўлены на традыцыйных сцэнічных пляцоўках – асноўнай і малой сцэнах Магілёўскага абласнога драматычнага тэатра, Магілёўскага абласнога тэатра лялек, канцэртнай залы «Магілёў», на сцэне Абласнога цэнтра творчасці. У прасторы моладзевага клуба «Cuba» адбудзецца акустычны канцэрт – музычна-тэатральны праект, які прэзентуе ZBSband (Кіеў, Украіна).

Новаўвядзенні

Новаўвядзенні гэтага года – вялікая колькасць паўторных паказаў спектакляў, прычым не толькі на камерных пляцоўках, але і на вялікіх сцэнах. У розныя дні ў канцэртнай зале «Магілёў» двойчы пакажуць «Камедыю аб удаве» (Дзяржаўны акадэмічны тэатр імя Яўгена Вахтангава, Масква), тэатры лялек – спектакль «Мёртвыя душы» (Гарадскі драматычны тэатр «Пошук», Лесасібірск, Расія). На малой сцэне драмтэатра двойчы ў адзін дзень пакажуць спектаклі «Марыя Сцюарт», «Лавіна», «НоУ ШоУ», «Ахвяра», у тэатры лялек – «Лю-Бёф».

Выбар «Падзеі форума»

Ад конкурснай праграмы арганізатары фэста ўжо даўно адмовіліся, але некалькі намінацый ўсё ж засталося. Сваю «Падзею форума» выберуць дзве групы: прафесійныя крытыкі і моладзевая рэдакцыя, якая кожны дзень будзе працаваць на «M.@rt.кантакт». Традыцыйна падключаць гледачоў: прыз прысуджаецца па выніках галасавання, у якім прапануецца прыняць удзел усім прысутным у зале. Для гэтага неабходна свой білет (або кантрамарку) пасля заканчэння спектакля апусціць у скрыню, размешчаную ў фае, аддаючы тым самым перавагу канкрэтнай пастаноўцы. Адначасова з гэтым пройдзе галасаванне ў сацыяльных сетках. Усе вынікі падвядуць 27 сакавіка на сцэне Магілёўскага абласнога драматычнага тэатра падчас урачыстага закрыцця форуму.

Старт продажу квіткоў на «M.@rt.кантакт»

Квіткі на спектаклі XV Міжнароднага тэатральнага форума «М.@rt.кантакт» паступяць у продаж 8 студзеня ў 8.00. Квіткі можна будзе набыць у тэатральнай касе, а таксама праз нтэрнэт (у тым ліку забраніраваць) на сайце http://kinoteatr.megamag.by. Даведкі аб продажы квіткоў па тэлефонах: 8 (0222) 65-50-53 (адміністратары), 8 (0222) 65-66-04 (каса тэатра).

У сацыяльны сетках арганізавалі конкурс: пераможцы атрымаюць квіткі на спектаклі

Напярэдадні форума арганізатары абвясцілі конкурс у сацыяльных сетках. Гледачам прапануецца расказаць, што для іх значыць «М.@rt.кантакт». Трэба зрабіць пост на сваёй старонцы «Укантакце», на Facebook або ў Instagram, дадаць хэштэгі #моймартконтакт і #мартконтакт2020 і чакаць завяршэння спаборніцтваў. Аўтараў найлепшых пастоў чакаюць запрашальныя білеты на спектаклі форума ў сакавіку 2020 года і памятныя прызы.

Дзе сачыць за навінамі форума?

на сайце Магілёўскага драматычнага тэатра www.mdrama.by/martkontakt

і ў сацыяльных сетках:

VK: https://vk.com/martkontakt

Instagram: https://www.instagram.com/mart.kontakt

Facebook: https://www.facebook.com/Mart.kontakt

З гісторыі

Праект «M.@rt.кантакт» стартаваў у 2006 годзе. За 14 гадоў правядзення форум стаў адной з самых значных і чаканых культурных падзей не толькі ў Магілёве, але і ва ўсёй тэатральнай прасторы Беларусі. Геаграфія форума шырокая. За ўсе гады на ім было паказана 237 спектакляў тэатрамі з 22 краін. Іх паглядзела амаль 50 тыс. гледачоў.

Заснавальнікамі форума з’яўляюцца Міністэрства культуры, Магілёўскі абласны выканаўчы камітэт, Магілёўскі абласны драматычны тэатр.